Michela: “To’o ohin loron ha’u nafatin la simu realidade”
DILI, 07 Agostu 2025 (TATOLI)–Osan bele buka. Matenek (koñesimentu) bele esploradu. Maibé, oportunidade atu hakuak aman-doben hela de’it ona ho mehi.
Hanesan mehi, Michela de Araújo sente nia aman nia falesimentu hanesan mehi ida. La’ós realidade. Husi inserteja ne’e, hafalun nia ho sorrizu maibé nia la konxiente. Iha sorrizu ida nia kotuk ne’e, iha tristeza invizível.
Nia lakon nia aman-doben. Mate hanesan mistériu ida. Nia nunka imajina atu lakon ema ne’ebé nia tane. Bainhira rona novidade aman hakotu-iis, nia la fiar ne’e realidade ida.
“Bainhira ha’u simu notísia kona-ba ninia mate, la sente katak ne’e realidade. To’o ohin loron nafatin la simu realidade. Hanesan ha’u sei iha mehi laran ne’ebé seidauk hadeer,” Michela haktuir iha rezidénsia saudozu Alcino Barris, Kinta ne’e.
Notísia relevante: Família sente triste lakon ema matenek no umilde hanesan Saudozu Alcino Barris
Michela hanesan oan feto husi Saudozu Antigu Prezidente Komisaun Nasionál Eleisaun (CNE-sigla portugeza), Alcino de Araújo Barris.
Mate ne’e mai dala ida de’it maibé ninia impaktu bele sente iha moris tomak. Antes hakotu-iis, aman promete buat ida ba nia oan. Sei hein oan to’o graduada iha Darwin-Austrália. Promesa hela promesa. Promesa la sai realidade. Maromak iha planu seluk ba nia moris.
“Buat ne’ebé halo susar liu mak bainhira ha’u atu sai bá rai-li’ur, Darwin, atu kontinua ha’u-nia estudu, buat hotu di’ak hela. Até mezmu iha loron ikus nia sei moris, nia promete atu hein ha’u to’o ha’u gradua. Maibé, lahatene katak sei sai hanesan tempu ikus ami rua hamutuk. Ha’u nunka espera atu lakon nia lalais de’it hanesan ne’e,” Michela hateten ho matabeen.
Tristeza tanba mate la’ós frakeza maibé prova husi domin ida. Michela triste la’ós tanba lakon de’it aman más lakon domin eterna husi aman.
Isin bele hakoi maibé ninia domin nunka dezaparese. “Ninia memória sei la lakon. Nia parte ida husi ha’u. Ha’u lori nia lian iha ha’u-nia hanoin, nia kontente iha ha’u-nia hamnasa no ninia domin iha dalan neʼebé ha’u hili atu moris. Obrigadu Papá ba buat hotu. Ba ita-nia forsa, ita-nia lisaun, ita-nia hamnasa no ita-nia domin rohan laek,” nia tenik.
Jornalista: Osória Marques
Editór: Xisto Freitas da Piedade
