DILI, 08 Agostu 2025 (TATOLI)—Ministériu Planeamentu no Investimentu Estratéjiku (MPIE, sigla portugés) propoin millaun $1 ba saláriu vensimentu, iha reuniaun Komité Revizaun Orsamentu (KRO) 2026.
Ministru Planeamentu no Investimentu Estratéjiku, Gastão de Sousa, hateten MPIE nia funsaun ne’e mak atu haree planeamentu ne’e la’o oinsá no investimentu fundu minerál ne’e atu investe ba área importante saida de’it.
Investimentu ne’e, seidauk ko’alia tanba sei iha diskusaun ketak fundu infranstrutura ne’e sei investe ketak, ne’eduni mak ohin ko’alia de’it kona-ba funaionamentu ministériu ne’e rasik no unidade tutelada sira.
“Ohin, deskute de’it kona-ba nia operasionál de’it, ne’ebé diskute ida-ne’e ami aprezenta adisionál sempre iha, tanba osan ne’ebé alokasaun husi Ministériu Finansa sei hatun ba buat ne’ebé ami propoin ba,” Governante ne’e hateten ba jornalista sira iha salaun Kay Rala Xanana Gusmão, iha Ministériu Finansa, Aitarak-Laran, kinta (07 Agostu 2025) ne’e.
Liuliu, nia dehan, ida-ne’e indika ba salariu vensimentu tanba ne’e mak tenke ajusta fila fali no sei koordena ho Komisaun Funsaun Publiku (CFP) para haree funsionáriu hira mak presiza no kazuál hira mak presiza.
“Ha’u sei haree asetu adisionál ne’e,” nia dehan.
Tanba ne’e, MPIE propoin millaun $1-resin ba saláriu vensimentu, ba bens-servisu rihun $100-resin, kapitál menór rihun $300 no kapitál dezenvolvimentu rihun $270.
“Kapitál umanu mós hanesan osan ne’ebé aloka naton ba atu selu bolseiru sira-ne’ebé hala’o hela estudu iha rai-li’ur no rai-laran,” nia hateten.
Entretantu, Ministériu Planeamentu no Investimentu Estratéjiku (MPIE, sigla portugés) ezekuta Orsamentu Jerál Estadu (OJE) 2025 husi saláriu vensimentu, bens servisu no kapitál menór nian ne’e atinje ona 44%.
Jornalista : Alexandra da Costa
Editór : Cancio Ximenes
