KOVALIMA ,08 Agostu 2025 (TATOLI)- Diretór Jerál Servisu Kooperativa iha SEFOPE, Nelson Soares Carvalho, hamutuk ho Autoridade Kovalima, lansa fatuk dahuluk ba konstrusaun sentru formasaun lian Koreia no Japaun iha aldeia Lakonak Babo, suku Debos, Postu Administrativu Suai, Munisípiu Kovalima.
“Konstruisaun obra ida-ne’e la’ós SEFOPE ni’an, maibé Kovalima ni’an entaun ita hotu-hotu presiza tau matan tanba oferese benefísiu ba joven sira, ”Diretór Jerál Servisu Koperativa SEFOPE hato’o liuhusi nia diskursu lansamentu iha aldeia Lakonak, ohin.
Ho lansamentu ne’e, nia bolu antesaun ba ba líder komunitáriu sira no joven sira iha suku laran atu koopera hodi konstrusaun ne’e bele la’o di’ak, nune’e joven-sira bele aprende língua hirak ne’e.
“Programa Governu da-sia hakarak hakbesik sentru formasaun ba komunidade sira liuliu joven sira iha aldeia no suku sira atubele aprende lian hirak ne’e ho di’ak hodi bele compete iha merkadu traballu,” nia dehan
Nia relata projetu konstrusaun ne’e responsabiliza husi Empreza Feto lima.
“ Ami fiar katak kalendáriu ne’ebé mak iha tuir prosesu ita asina ona. Ha’u fiar empreza sei kumpre nune’e bele finaliza konstrusaun iha tempu besik” nia hateten.
Iha Sorin Seluk, Reprezenta Prezidente Autoridade Munisípiu Kovalima, Caetano dos Santos Ribeiro, fó atensaun ba empreza atu konstrui sentru formasaun tuir termu kontratu ho kualidade.
“Tanba polítika SEFOPE konstrui sentru formasaun atu benefisia ba ita-nia joven sira iha Kovalima hodi tuir formasaun atu ba servisu iha rai li’ur,” nia fó hanoin.
Entretantu, Diretór Empreza Feto Lima, Carlito dos Reis,esplika empreza konstrui edifísiu sentru formasaun uza traballadór ne’ebé mak finaliza formasaun iha SEFOPE.
“Konstrusaun ida-ne’e ita envolve traballadór ne’ebé mak tuir formasaun iha SEFOPE la uza traballadór husi estranjeiru, nune’e nia kompromete sei konstrui tuir termu kontratu ho kualidade”, nia kompromete.
Governu asina kontratu ho Empreza feto lima ho nia duraransaun fulan sia ho totál orsamentu $96,258.50.
Notisia relevante:SEFOPE inaugura sentru formasaun dalen Inglés iha Kovalima
Jornalista:Celestina Teles
Editór:Florencio Miranda Ximenes
