Veteranu Vikeke husu Governu aselera konstrusaun Jardín Eroi
VIKEKE, 08 Agostu 2025 (TATOLI)—Veteranu Munisípiu Viqueque, Daniel Sarmento ‘Fogeti’ husu Governu liuhusi Ministru Asuntu Kombatente Libertasaun Nasionál (MAKLN) aselera konstrusaun Jardín Eroi iha Postu administrativu Uatulari, Munisípiu Vikeke.
“Ita-nia eroi barak mate ba funu ne’ebé ohin loron ita rekolla ona tau hamutuk iha uma-mahon sira, maibé seidauk haloot. Tanba ne’e, ha’u hakarak husu ba Governu aselera konstrusaun Jardín Eroi sira hodi haloot ita-nia restu mortál sira-ne’ebé iha Munisípiu Vikeke ho dignu,” Daniel Sarmento ‘Fogeti’ ba TATOLI iha kampu futeból Vikeke Vila, Sesta ne’e.
Veteranu Munisípiu Vikeke ne’e hatutan daudaun ne’e restu mortál iha Munisípiu Vikeke rai iha uma-mahon Abana Ossú, Uefia Postu Lakluta, Bubur-Laran, Kraras Vikeke Vila no uma-mahon Uatulari.
“Jardín Eroi iha Uatulari konstruidu ona iha Suku Uma-Ua’in Leten, maibé seidauk finalizadu. Tan ne’e, husu ministériu relevante aselera obra sira-ne’e atu ita haloot restu mortál hirak-ne’e,” nia informa.
Notísia relevante: Restu mortál 10.726 mak sei iha uma-mahon munisípiu sira
Hatán ba preokupasaun ne’e, Ministru Asuntu Kombatente Libertasaun Nasionál, Gil da Costa Monteiro “Oan Soru”haktuir kona-ba obra Jardín Eroi iha Uatulari hahú konstrusaun iha tinan 2021, maibé seidauk finalizadu.
“Jardín Eroi iha Postu Uatulari hahú konstruidu iha tinan 2021, maibé to’o agora gapura seidauk hotu. Tanba ne’e, ita hapara ona empreza ne’ebé kaer obra. Dauduan ne’e ita loke filafali konkursu foun ba konstrusaun jardín referidu. Bainhira konkursu ne’e ramata sei hahú konstrui iha fulan ida-ne’e,” nia hato’o.
Jornalista: Vitorino Lopez da Costa
Editór: Xisto Freitas da Piedade
