Klínika Paz husu MS halo promosaun ba inan sira evita labarik ibun sakat
DILI, 09 Agostu 2025 (TATOLI)–Klínika Paz husu Ministériu Saúde (MS) nafatin halo promosaun edukasaun ba inan sira nune’e evita labarik sira ibun sakat.
”Ita haree labarik ki’ik moris mai ibun sakat barak loos, tanba ne’e husu ba Ministériu Saúde tenke halo promosaun edukasaun nune’e inan sira hatene hodi evita labarik moris mai labele ibun sakat,” Diretora Klínika Paz, Maria Dias hateten ba jornalista sira iha Hospital Nacional Guido Valadares (HNGV), Bidau, Sábadu ne’e.
Notísia relevante: Espesialista na’in-haat husi Austrália fó konsulta ba labarik sira ibun sakat
Nia dehan labarik sira menus nutrisaun iha inan nia kabun laran ne’e mak ibun sakat ka oinsá, ida-ne’e Ministériu Saúde tenke esplika ba inan sira.
Tanba ne’e, nia husu ba inan sira-ne’ebé labarik sira opera ona nia ibun bele bá kontinua iha Klínika Paz iha Bekora hodi bele haree filafali.
”Dezde 2011 Klínika Paz loke to’o agora rejista ona pasiente 30 resin. Nune’e, husu ba komunidade sé mak nia oan ibun sakat bele bá halo tratamentu iha Klínika Paz tanba Klínika Paz gratuitu ba ema hotu,” nia relata.
Iha fatin hanesan, pasiente Julieta Monteiro agradese ba Klínika Paz tanba durante ne’e opera nia ibun sakat di’ak to’o agora.
Jornalista: Felicidade Ximenes
Editora: Xisto Freitas da Piedade
