BAUKAU, 11 Agostu 2025 (TATOLI)—Konsellu Munisipál Kombatente Libertasaun Nasionál (CMCLN-sigla portugeza), Segunda ne’e, realiza konferénsia ba daruak hodi hili estrutura CMCLN Munisípiu Baukau ba períodu 2025-2030.
Ministru Asuntu Kombatente Libertasaun Nasionál (MAKLN), Gil Oan Soru esplika konferénsia ba daruak iha kada munisípiu sei realiza iha territóriu nasionál iha-ne’ebé loloos realiza ona iha tinan-2024, maibé halo adiamentu tanba kestaun serbisu nune’e foin akontese hikas iha Lautein, Vikeke no ohin iha Baukau.
“Konferénsia ida-ne’e importante, bazeia ba Estatutu Kombatente Libertasaun Nasionál artigu 35 númeru 01 no Dekretu-lei numéru 07/2018 ne’ebé halo alterasaun ba Dekretu-lei nú. 33/2024,” Oan Soru hateten iha Sentru Konvensaun Baukau (CCB-sigla portugeza).
Governante ne’e salienta konferénsia munisipál realiza ona iha Munisípiu Lautein no Vikeke ne’ebé hili ona estrutura no Munisípiu Baukau sei realiza durante loron-rua, 11-12 Agustu ne’ebé konfresista maihosi postu administrativu neen no sei eleje estrutura ba mandatu tinan-lima.
Oan Soru husu estrutura foun CMCLN Baukau bainhira eleitu atu kontinua unidu, fó-hanoin ba malu nafatin liuliu hala’o kna’ar bazeia ba regulamentu hotu nune’e bele garante moris di’ak ba kombatente sira liuliu hasoru obstákulu no dezafiu barak relasiona ho lista kombatente sira-nian.
Iha fatin hanesan, Prezidente Konsellu Kombatente Libertasaun Nasionál (CCLN), Vidal de Jesus ‘Riak Leman’ hateten bazeia ba reklamasaun husi kombatente sira-ne’ebé rejistu iha tinan-2009, tan ne’e husu estrutura foun atu haka’as aan halo serbisu no husu konfresista sira hili estrutura foun ne’ebé la prejudika ba lista kombatente reklamante sira-nian.
“Tuir loloos ita-nia konferénsia hala’o iha 2024. Tanba serbisu, ita estende ba 2025,” Riak Leman haktuir.
Aleinde ne’e, Prezidente CMCLN Baukau, Fernando Beredu’u Gusmão informa katak faze kontribuisaun ba CMCLN Baukau atu terminadu, nune’e liuhosi konferénsia ne’e sei hili fali estrutura foun ba períodu tinan-lima mai.
“Ha’u labele dehan kandidatu aan. Ha’u lakohi. Sira delegadu mak hakarak kandidatu ha’u. Sira la kandidatu ha’u, ha’u lakohi kandidatu ha’u-nia aan, tanba veteranu barak atu troka malu,” Beredu’u hateten.
Entretantu, konferénsia Munisipál CMCLN iha Baukau partisipa husi konfresista ne’ebé maihosi postu administrativu neen ho totál na’in-309 ne’ebé maioria husi veteranu dedikasaun eskluziva grau 8-14, 15-19 no 20-24.
Husi totál númeru referidu maihusi kada postu administrativu na’in-50 hanesan Postu Administrativu Baukau Vila, Baguai, Venilale, Vemasse, Laga no Kelikai inklui na’in-sia husi estrutura munisipál sesante.
Jornalista: Natalino Belo
Editór: Xisto Freitas da Piedade
