VIKEKE, 11 Agostu 2025 (TATOLI)—Diresaun Nasionál Transporte Terrestre (DNTT) Munisípiu Vikeke, Segunda ne’e, hahú fó teste pratika tama roda ba motorista hamutuk 620 ne’ebé atu hetan karta kondusaun.
Iha abertura teste pratika ba karta kondusaun ne’e, Diretór DNTT Munisípiu Vikeke, Saul Henrique haktuir kona-ba teste pratika tama roda ne’e kandidatu sira liuhusi prosesu tolu hanesan rejistu, teste eskrita no ikus mak teste tama roda ba motorista motór no karreta nian.
“Husi prosesu tolu ne’e ramata, foin ami halo pedidu ba nasionál hodi apoiu ezaminadór, tanba ami seidauk iha ezaminadór. Purtantu, teste pratika tama roda agora ne’e oferese husi nasionál,” Saul Henrique ba TATOLI iha resintu PNTL, Beskem, Segunda ne’e.
Notísia relevante: DNTT-PNTL sei fó teste ba motorista sira atu hetan karta kondusaun
Diretór DNTT Munisípiu Vikeke ne’e hatutan teste ba karta kondusaun ne’e durante loron lima, hahú husi segunda to’o sesta, iha-ne’ebé teste motorista ba motorizada segunda to’o kuarta no kinta to’o sesta ne’e ba karreta.
“Ami sei esforsu para to’o sesta ne’e bele finaliza. Tan ne’e, ba teste ne’e oportunidade ba ema ida dala-rua. Karik dala-rua mak la liu sei hein prosesu tuirmai. Maibé, sira-ne’ebé pasa iha teste ne’e sira bele foti karta kondusaun provizória,” nia esplika.
Enkuantu, oráriu teste hahú husi dadeer tuku 08:30 to’o tuku 12:00 Otl no kontinua husi tuku 14:00 to’o tuku 17:30.
Ekipa ezaminadór kompostu husi DNTT nasionál hamutuk na’in-5, apoiu husi DNTT munisípiu na’in-3 no apoiu husi Polísia Nasionál Timor-Leste (PNTL) Munisípiu Vikeke liuhusi Unidade Tránzitu.
Jornalista: Vitorino Lopez da Costa
Editór: Xisto Freitas da Piedade
