DILI, 11 Agostu 2025 (TATOLI)-Ministru Defeza Kontra Almirante, Donaciano Costa Gomes Pedro Klamar Fuik, hateten lei reforma ne’ebé governu konstitusionál da-sia aprova iha Konsellu Ministru sei dignifika vereranu ne’ebé sei ativu iha instituisaun F-FDTL bainhira pasa ba idade reforma.
“Lei ida di’ak liu ne’e mak IX governu konstitusionál aprova ne’e. Lei ida dignifika veteranu sira ne’e maka ita halo lei sira ne’e, ida-ne’e la’ós públiku maka determina, maibé ida-ne’e tenke tuir Governu no tuir Estadu mak determina, no inklui lei ba buat hotu-hotu, ba Estadu, ba nasaun no ba ema hotu-hotu”, Klamar Fuik hateten ba jornalista sira iha Ministériu Finansa, segunda-ne’e.
Nia dehan molok lei ne’e aprezenta ba Konsellu Ministru, aprezenta ona ba Konsellu Superiór Defeza no Militár. “Konsultasaun ne’e iha mekanizmu Konsellu Superior Defeza Militár, sé de’it maka ko’alia iha mídia dehan laiha konsultasaun ne’e la koñese irarkia militár. Signifika seidauk transforma nian-án. Kuandu hatene reforma, signifika maka ida-ne’e, modernizasaun no profisionalizasaun, signifika ida-ne’e”.
Nia esplika, lei reforma ne’e públika ona iha Jornál Repúblika, entra no vigór hahú 31 Dezembru 2025, nune’e sei fó reforma ba veteranu sira ne’ebé sei ativu iha F-FDTL.
Ministru Defeza dehan seidauk simu lista iha ema-na’in hira mak atu reforma. Tanba Governu seidauk pronúnsia buat ruma.
“Xefe Estadu Maiór Jenerál mak sei aprezenta lista reforma nian, ne’ebé Xefe Estadu Maiór Jenerál seidauk aprezenta, entaun Ministru seidauk bele komenta”, nia afirma.
Governante ne’e dehan, reforma ne’e direitu-ida tanba define iha lei. “Hanesan ita-boot nia profisaun agora jornalista, kuandu ita-boot to’o tinan (idade 60) ona, haree ba valór hotu ne’ebé mak iha, ita ema dehan tenke ba uma deskansa, entaun tenke ba uma deskansa”, nia konklui.
Notísia relevante: Komandu F-FDTL sei reforma veteranu ativu 80 iha loron FALINTIL
Jornalista : Natalino Costa
Editora : Rita Almeida
