DILI, 11 Agostu 2025 (TATOLI)—Ministériu Asuntu Kombatente no Libertasaun Nasionál (MAKLN) sei entrega kazu impedimentu konstrusaun jardín eroi ba Autoridade Kovalima hodi rezolve.
“Sira mantein impede ba konstrusaun jardín eroi iha Kovalima ne’e, entaun orsida ka aban ami sei bá iha Autoridade munisípiu Kovalima hodi entrega asuntu ne’e ba nia atu rezolve. Karik iha solusaun no rezultadu ba kestaun ne’e mak ami kontinua hala’o konstrusaun jardin eroi iha Kovalima, se laiha ami kansela projetu ne’e,” Sekretáriu Estadu ba Veteranu, Cesár do Santos da Silva ‘Merak’, informa ba jornalista sira, iha Kaikoli, Segunda ne’e.
Sekretáriu Estadu dehan, MAKLN ho nia ekipa bá halo limpeza bazeia ba legalidade tanba molok atividade limpeza realiza, ekipa husi ministériu aprezenta dokumentu legál rua.
“Ami la obriga, la ho forsadamente, ka ilegalmente maibé ami bá bazeia ba legalidade husi Terra no Propriedade nian seluk fali husi Sekretáriu eleitu Konsellu Kovalima lori mai,” nia akresenta.
Sekretáriu Estadu haktuir, tuir sira-nia deklarasaun katak rai ne’e privadu ka rai eransa kulturál husi avo na’in-haat husi uma-lisan Manehatak, ho ida-ne’e sira impede.
“Sira impede tiha fatin ne’e ami seidauk halo identifiksaun ba fatin konstrusaun seluk. Maibé desizaun hotu ami entrega ba Autoridade munisípiu mak rezolve situasaun ne’e. La’ós ami mak rezolve maibé entre sira ho Terra no Propriedade mak hatene malu. Tanba sira mak na’in ba rai, kuandu Tribunál bolu ami hatán ami la’o tuir atribuisaun ne’ebé iha,” nia informa.
Notísia reelvante : Ministru Gil orienta ona kompañia atu aselera konstrusaun jardín eroi iha territóriu
Fatin ne’ebé identifika ba konstrusaun jardin eroi ne’e rai mamuk, ne’ebé komunidade la hela bá, tanba ne’e hanesan Rumah Sangat Sederhana (RSS).
Bainhira ekipa MAKLN hamutuk ho Autoridade munisípiu bá halo limpeza ba fatin ne’e, sira mós ba hamoos fatin.
Tanba ne’e, Autoridade munisípiu, Terra no Proriedade mak bele buka solusaun.
“Ami hein desizaun husi Autoridade no Terra no Propriedade tanba ita iha restu mortál iha ne’ebá hamutuk 778, ne’ebé iha uma-mahon rua, ida mak iha postu Maukatar Vila hamutuk 470 no aldeia Lokeiu iha 308,” nia relata.
Iha sorin seluk, Portavós MAKLN, Angelito Soares da Silva, hateten, ekipa MAKLN halo konferénsia imprensa relasiona ho informasaun ne’ebé fó sai ona husi uma-lisan ‘Manehatak’ husi aldela Dais, suku Belecasac, iha loron Tersa, 05 Agostu 2025 kona-ba fatin konstrusaun ba jardín eroi no martir da pátria munisípiu Kovalima.
Tanba ne’e, molok MAKLN halo identifikasaun ba futuru jardín eroi no matir da pátria munisípiu Kovalima liuhusi prosesu sira mak hanesan tuir mai ne’e :
- Iha loron 24 Abril 2025 MAKLN halo enkontru konsultasaun ho estrura no responsável KMKLN munisípiu Kovalima, no kontinua halo enkontru ho Autoridade munisipál Kovalima inklui Terra no Propriedade munisípiu Kovalima hodi halo identifikasaun ba rai no propriedade Estadu iha munisípiu Kovalima.
- Iha loron 25 Abril 2025 Autoridade munisípiu Kovalima (Reprezentante Prezidente Autoridade Kovalima, Diretór Terra no Propriedade), KMKLN Kovalima hamutuk ho Autoridade lokál suku Belecasac foti dezisaun hodi halo markasaun ba fatin futuru konstrusaun jardín eroi pátria (eis RSS) iha aldeia Dais, suku Belecasac.
- Iha loron 21 Maiu 2025, ekipa MAKLN no KMKLN munisípiu Kovalima halo enkontru hamutuk ho Autoridade suku Belecasac hodi prepara estabelese pilár iha fatin identifikadu.
- Iha loron 22 Maiu 2025, estabelese pilár iha fatin identifikadu bazeia ba dezeñu ne’ebé prepara ona husi Terra no Propriedade munisípiu Kovalima ho nia medida rai metru 2000.
- Iha loron 05 Juñu 2025 halo serimónia kulturál husi lisan sira iha suku Belecasac molok halo serbisu limpeza.
- Iha loron 13 Juñu 2025 funsionáriu públiku ho liña ministeriál munisípiu Kovalima, responsável veteranu no estrutura KMKLN Kovalima ne’ebé mak akompaña husi ekipa tákniku husi MAKLN halao limpeza iha fatin konstrusaun jardín eroi pátria munisípiu Kovalima iha suku belecasac.
- Iha loron 20 Juñu 2025, kontinua halo limpeza jerál
- Iha loron 26 Juñu 2025 halo kulturál iha fatin konstrusaun antes ekipa Institutu Jestaun Ekipamentu (IGE). halo limpeza ba fatin konstrusaun.
- Iha loron 10 Jullu 2025 halo limpeza (site cleaning) husi ekipa Institutu Jestaun Ekipamentu.
Jornalista : Osória Marques
Editora : Julia Chatarina
