MD propoin adisionál millaun $49 iha OJE 2026
DILI, 11 Agostu 2025 (TATOLI)-Ministru Defeza Kontra Almirante, Donaciano Costa Gomes “Pedro Klamar Fuik”, aprezenta orsamentu adisionál ba tinan 2026 ho montante millaun $49.
“Orsamentu ne’e sei prioriza ba programa espesiál sira hanesan sustenta forsa, tanba parte integrante oinsá mak ita-nia Governu, ita-nia Estadu haree para bele mantein ita-nia forsa”, ministru hatete ba jornalista sira hafoin aprezenta orsamentu 2026 iha ministériu finansa, segunda-ne’e.
Nia esplika, tetu inisiál ne’ebé ministériu defeza simu $8.300.000 (oitu millaun e trezentu dolár), nune’e ámbitu diskusaun iha Komisaun Revizaun Orsamentu (KRO) propoin adisionál millaun $49.
Objetivu prinsipál husi adisionál ne’e, nia dehan foka ba implementasaun programa militár nian no aumenta nesesidade sira seluk.
Nia dehan, orsamentu Institutu Defeza Nasionál (IDN) ba tinan oin $1.606.000, adisionál $1.000.007, tanba tinan-oin sei loke academia militár konjunta.
“Orsamentu inisiál no adisionál ba Ministeriu Defeza no FALINTIL-Forsa Defeza Timor-Leste inklui Institutu Defeza Nasionál ba tinan oin ne’e razoavel, maibé proposta ne’ebé mak instituisaun hirak ne’e hotu aprezenta atraves husi Ministériu Defeza iha konsiderasaun di’ak husi Ministériu Finansa, liuliu komisaun revizaun”, afirma nia.
Ministru akresenta, KRO liuhusi Prezidente Komisaun Revizaun Orsamentu sei halo diskusaun klean ho Ministériu Finansa hafoin deside aumenta ka la’e, ne’e depois mak haree no oinsá mak prioritiza hodi atribui orsamentu sira-ne’e.
Notísia relevante: Ministériu Defeza husu adisionál millaun $10 iha OJE 2025
Jornalista : Natalino Costa
Editora : Rita Almeida
