DILI, 11 Agostu 2025 (TATOLI)–Ministériu Edukasaun (ME) sei fasilita formasaun pedagojia ba profesór 187 ne’ebé rekrutadu husi Bolsa Kandidatu, hafoin koloka ba ensinu báziku iha territóriu.
“Kona-ba profesór 187 Bolsa Kandidatu ne’e ita sei fasilita formasaun pedagojia atu oinsá hasa’e koñesimentu profesór sira-nia ba prosesu aprendizajen iha saladeaula,” Diretór Nasionál Rekursu Umanu iha ME, João Amaral, informa ba Ajénsia TATOLI, iha ninia knaar fatin, Vila-Verde, Segunda ne’e.
Diretór ne’e konsidera profesór sira presiza iha formasaun tanba sira sei hanorin labarik iha eskola ensinu báziku no pre-eskolár.
Ekipa husi ME sei fó formasaun iha fulan ne’e nia laran, durante semana ida iha Rairobo Bobonaru.
“Ida-ne’e mak ami sei koloka sira tuir lista ne’ebé iha liuhusi kuadru pesoál tanba molok ita koloka primeiru halo xamada ba sira, mai prense uluk termu aseitasaun, se sira aseita ita koloka tuir kuadru pesoál ne’ebé iha tuir nesesidade eskola ida-idak nia ne’ebé ita atu koloka bá,” nia esplika.
Notísia relevante : Ministra Edukasaun otimista manorin programa bolsa kandidatu sei simu saláriu iha Jullu
Diretór dehan, ME hasoru problema iha kolokasaun, hanesan bainhira profesór hetan ona kolokasaun, maibé ikus mai sira husu transferénsia no balun moras.
“Ha’u hakarak esklarese katak kolokasaun ba terseiru siklu, ita koloka tuir disiplina ne’ebé iha, se manorin ne’e iha área matemátika ita koloka ba área matemátika, tanba tuir nesesidade kuadru pesoál, maibé iha filiál sira hanorin tuir matéria jerál,” nia tenik.
Aleinde ne’e, tuir dadus ME koloka ona profesór 2.000-resin husi Bolsa Kandidatu ba eskola pre-eskolár no ensinu báziku iha teritóriu.
“Agora provizóriu profesór sira ne’ebé iha Bolsa Kandidatu hela 1.000-resin maibé agora ita atu koloka tan 187, entaun hela 900-resin mak sei iha bolsa nia laran,” nia katak.
ME identifika mós katak, númeru reforma obrigatóriu ba tinan oin barak, nune’e sei koloka tuir eskola menus profesór sira.
Jornalista : Osória Marques
Editora : Julia Chatarina
