VIKEKE, 12 Agostu 2025 (TATOLI)—Konferénsia Daruak ba Konsellu Kombatente Libertasaun Nasionál (CCLN-sigla portugeza) konfresista sira kontinua fó konfiansa ba veteranu Adriano Câmara ‘Lentil’ nu’udár Prezidente CCLN Munisípiu Vikeke ba mandatu 2025-2030.
Prezidente Eleitu CCLN Munisípiu Vikeke, Adriano Câmara ‘Lentil’ haktuir katak konferénsia daruak ne’ebé hala’o durante loron rua, 08-09 Agostu ne’e pakote ida de’it.
“Konferénsia ne’e loloos liuhusi eleisaun, maibé durante konferénsia ne’e pakote tuan de’it ne’ebé sai pakote úniku. Tan ne’e, konfresista sira kontinua fó konfiansa ba ha’u no estrutura sira hodi lidere CCLN Munisípiu Vikeke ba mandatu tinan-lima,” Lentil ba TATOLI iha Postu Vikeke Vila, Tersa ne’e.
Prezidente CCLN Vikeke ne’e dehan, ba konfiansa ne’ebé veteranu sira husi munisípiu Vikeke oferese estrutura CCLN ba periodu tinan liman ne’e hodi serve ba komvatente no veteranu sira iha munisípiu ida-ne’e.
“Buat ne’ebé importante ba ami mak haree ba dadus uma lisan sira, haree veteranu sira-ne’ebé mate hanesan sai mártir maibé sira-nia pensaun Governu la aprova. Nune’e ami sei aprezenta filafali,” nia informa.
Notísia relevante: CCLN Vikeke realiza konferénsia daruak hili estrutura foun
Nia haktuir dadus veteranu reklamasaun hamutuk 5.449 ne’ebé sei tama ba re-verifikasaun ne’ebé sei realiza iha Outubru tinan-ne’e.
Aleinde ne’e, Lentil tenik, estrutura CCLN sei fó-atensaun ba jardín eroi sira hodi haloot eroi sira-ne’ebé agora daudaun iha uma-mahon sira iha postu administrtivu.
“Tanba ne’e, iha ami mandatu daruak ne’e sei halo identifikasuan ba jardín eroi sira hanesan Postu Vikeke Vila mak seidauk ne’ebé ami sei identifika filafali rai. Ba Postu Ossú identifika ona iha área Luka-Oan, Lakluta mós iha ona, Uatulari nian agora faze konstrusaun no Uatukarbau rai iha ona. Jardín sira-ne’e ami sei aprezenta ba ministériu hodi halo morru hale’u jardín,” Lentil esklarese.
Jornalista: Vitorino Lopez da Costa
Editór: Xisto Freitas da Piedade
