Autoridade Postu Baguia husu kompañia aselera konstrusaun ponte Samalari
BAUKAU, 12 Agostu 2025 (TATOLI)—Autoridade Postu Administrativu Baguia, Munisípiu Baukau kontinua ezije kompañia responsavel atu aselera konstrusaun ponte iha Samalari, Postu Baguia.
Administradór Postu Administrativu Baguia, Mário Xavier da Silva esplika kompañia mobiliza ona materiál no hahú hamoos fatin, ke’e estaka inklui monta besi no tuir autoridade nia observasaun projetu referidu sei la finaliza tuir durasaun kontratu ne’ebé kompañia hala’o ho Governu.
“Konstrusaun ponte Samalari ne’e hahú ona maibé tarde, tanba ita-nia kondisaun dalan mak hanesan ne’e. Maski nune’e, ha’u haree sira komesa book ona,” Administrador Postu Administrativu Baguia hateten iha Vila Nova, Baukau, Tersa ne’e.
Notísia relevante: MOP hatuur fatuk dahuluk ba konstrusaun ponte Samalari
Mário Xavier salienta hafoin seremónia lansamentu fatuk dahuluk tuir loloos kompañia komesa ona obra maibé kondisaun dalan liuliu ponte Gomilafa iha baliza entre Suku Atelari, Postu Laga no Suku Lavateri, Postu Baguia kloot difikulta mobiliza ekipamentu konstrusaun.
Maibé, parte kompañia buka solusaun hodi utrapasa mobilizasaun materiál, maski ponte referidu nafatin sai obstákulu ba kompaña hodi utrapasa transporta ekipamentu ba konstrusaun ponte Samalari.
“Ami ho Xefe Suku nafatin informa ba kompañia atu aselera konstrusaun, tanba la kle’ur udan ona. Ho kondisaun hirak-ne’e mak ita ezije atu aselera projetu ne’e,” Mário tenik.
Entretantu, projetu konstrusaun ponte iha Suku Samalari responsabilza husi Kompañia MCC20 Grup Corp, Ltd, R.p númeru Tender/009/MOP-2024 ne’ebé sei konstrui ho durasaun fulan-12 ho valór orsamentu hamutuk $4.025.
Jornalista: Natalino Belo
Editór: Xisto Freitas da Piedade
