Top

“Benefisiu ba povu, nusa mak tenki altera”

Ministru Justisa, Sérgio Hornai. Imajen Tatoli/Francisco Sony

DILI, 12 Agostu 2025 (TATOLI)-Ministru Justisa, Sergio Hornai, dehan sei la halo alterasaun ba kapa kódigu sivíl anotada tradusaun lian-tetun ho imajen Primeiru-Ministru, Kay Rala Xanana Gusmão, tanba konsidera benefisiu ba povu.

“Ita labele altera buat ruma, se nia benefisiu ba povu nusa mak tenki ba altera. Ema ida ka rua halo komentáriu ne’e normál. Se-nia (Primeiru Ministru) husu ona, orsida nia sei husu ba ha’u no ba señor Vise Ministru, Paulo Remedios, atu haree tau buat balu. O que sertu ita hotu-hotu akompaña buat boot iha oin barak mak ita tenki halo ba ida-ne’e”, hatán nia ba jornalista sira hafoin partisipa enkontru Kómite Revizaun Orsamentu (KRO) iha Ministériu Finansa, tersa-ne’e.

Eis-Komisáriu Anti Korrupsaun ne’e hatán ba jornalista dehan saida mak Xefe Governu ko’alia ba imprensa katak la konkorda uza nia imajen iha kapa livru ne’e hanesan jestu halimar ho jornalista sira.

“Tenki haree didi’ak katuas nia jestu, ita-nia sua eselénsia Primeiru Ministru nia jestu, nia halimar uituan ho ita-boot (jornalista) sira”, nia akresenta.

Hatán kona-ba halo uluk konsultasaun ho Primeiru Ministru, ministru hateten husik ba tempu mak justifika de’it, tanba durante hasoru malu iha enkontru KRO la ko’alia konaba asuntu ne’e.

“Ami ohin konversa orsamentu, konversa buat sira ne’ebé importante”, nia konklui.

Antes ne’e, Primeiru-Ministru, Kay Rala Xanana Gusmão, hatete apresia servisu ne’ebé ekipa halo hodi prodús kódigu sivil anotadu ho lian-tetun, tanba bele ajuda sosiedade hodi kumpriende lei kódigu sivil iha Timor-Leste.

“Ha’u labele simu ha’u-nia foto iha ne’ebá, tanba ha’u lei ne’e la hatene”, hatán nia ba jornalista sira hafoin reuniaun Komisaun Revizaun Orsamentu ne’ebé hala’o iha Ministériu Finansa, segunda-ne’e.

Nia hatutan hodi ko’alia ba jornalista sira: “Lei ne’e ha’u la hatene, lei ne’e ami Manatutu ne’e ami hatene tebtebes, tanba saida, uluk k’iik ne’e ami halo lei ona. Ha’u iha ne’e uluk fatuk moras ba orsamentu, imi mai fali ho ha’u nia figura iha Kódigu Sivil, ida-ne’e hau lahatene”.

Notísia relevante: Kódigu Sivíl Tetun & Anotadu sei tulun serbisu autór judisiáriu sira

Jornalista       : Natalino Costa

Editora           : Rita Almeida

Publisidade

Leave a Reply

Latest Post

error: Content is protected !!