DILI, 12 Agostu 2025 (TATOLI)—Diretór Nasionál Ensinu Sekundáriu Jerál (ESJ) Ministériu Edukasaun (ME), Benjamin Fernandes, solisita dirijente ESJ iha territóriu nasionál atu submete relatóriu konsensaun eskolár.
“Atu informa ba ita-boot sira katak konsesaun eskolár ne’e trimestre rua mak ami fó ona ba eskola inklui Eskola FINANTIL. Tanba ne’e, husu atu submete relatóriu. Ami fó ultimatu ba sira to’o de’it 20 Agostu. Katak, molok loron 20 Agostu sira tenke submete ona, nune’e ita bele prepara fali ba trimestre rua tuirmai,” nia dehan ba jornalista sira iha Eskola Sekundária Jerál FINANTIL, Aimutin, Tersa ne’e.
Benjamin hateten relatóriu ne’e presiza aselera tanba liuhosi relatóriu mak Minstériu Edukasaun bele prosesa fali konsensaun eskolár ba trimestre rua ikus ne’e.
Notísia relevante: ME aloka osan konsesaun eskolár ba ESTV iha territóriu
Diretór ne’e akresenta katak Munisípiu Ermera nian mak submetidu ona inklui Manufahi, Manatutu, más munisípiu barak seidauk hatama.
“Ezame nasionál sei hala’o iha 20 Outubru tinan ne’e. Bainhira la hatama, konsekuénsia mak sira la hetan konsesaun iha faze tuirmai,” nia informa.
Jornalista : Osória Marques
Editora : Julia Chatarina
