MS fó formasaun ba pesoál saúde kona-ba fó imunizasaun di’ak ba labarik
DILI, 12 Agostu 2025 (TATOLI)—Ministériu Saúde liuhusi Diresaun Nasionál Imunizasaun fó ona formasaun ba pesoál saúde sira iha Munisípiu lima hanesan RAEOA, Lautein, Manufahi, Ainaru no Baukau kona-ba oinsá fó imunizasaun di’ak ba labarik sira.
Xefe Departamentu imunizasaun iha MS, Maria Angelina Pereira, informa husi departamentu imunizasaun fó formasaun ba pesoál saúde sira, atu oinsá mak atende labarik sira liuliu fó vasinasaun ba sira atu labele hamosu kazu sira hanesan ain-bubu.
“Agora daudaun departamentu halo formasaun ba profisionál saúde sira, hodi hadi’a kualidade servisu ba iha pesoál saúde sira hodi atende ita-nia oan sira, atu nune’e labele mosu hanesan kazu hanesan kelen bubu. Depois vasina ida ne’e mak progresu ne’ebé mak husi pesoál saúde husi nasionál tun mai iha munisípiu no tun mai iha sentru saúde sira hodi fó formasaun ba iha pesoál saúde sira hatene, oinsá ho atende di’ak seguru ho loloos,” Maria Angelina Pereira hateten ba jornalista sira iha Hotel Timor, ohin.
Nia hateten, iha formasaun ne’e kona-ba imunizasaun prátika ka halo refreshing training ba iha pesoál saúde iha kada sentru saúde.
“Ita foti sentru saúde ho nia responsavel kada sentru saúde iha ema na’in-tolu (3), se lae iha ema nain-haat (4) entaun totál hamutuk kuaze 24. Agora dadauk implementa iha munisípiu lima ne’ebé mak ita fó ona formasaun ba imunizasaun prátika oinsá mak halo jestaun ne’ebé mak di’ak, oinsá mak halo atendementu ne’ebé di’ak tuir matadalan ne’ebé mak iha. Depois oinsá mak halo supervizaun depois avalia fila-fali ba servisu ne’ebé mak iha ladun di’ak bele hadi’a fila-fali,” nia dehan.
Formasaun ba pesoál saúde sira-ne’e fó ba kada munisípiu hodi hatene oinsá mak vasinasaun ne’ebé mak loos, injeksaun ne’ebé mak di’ak no prátika ne’ebé mak loos, bainhira ba labarik sira ne’ebé mak la mai vasina ne’e no ekipa saúde mós tama sai uma hodi buka tuir labarik sira mai vasina.
“Presiza tebes halo formasaun espesifiku ba imunizasaun, tanba agora dadauk ita-nia pesoál saúde balun foun barak liuliu kontratadu sira foun barak. Depois iha fali mudansa hanesan xefe halo rotasaun entaun presiza tebes halo treinamentu ba sira, atu nune’e bele aumenta sira-nia kapasidade maske balun tuan,” nia dehan.
Nia esplika, vasinasaun ne’e importante tebes hodi prevene ba moras sira-ne’ebé mak hamate ema agora daudauk moras ne’ebé mak bele prevene mak iha 13 mak hanesan moras Sarampo, Rubela, Hepatites, moras Polio, mear sira-ne’e no kakorok sira kanek ba pneumonia, tetanus, difteria no diareia.
Jornalista : Felicidade Ximenes
Editór : Cancio Ximenes
