DILI, 12 Agostu 2025 (TATOLI)—Sekretaria Estadu Peska prepara ona barraka ba negosiante hodi fa’an ikan iha Taibesi no Manleuana, nune’e hein para utiliza.
“Organiza sidade normalmente atividade komérsiu iha nia fatin no durante ne’e públiku no vendedór kestiona maka’as katak muda ema maibé la prepara kondisaun. Entaun, ho ida-ne’e mak Ministériu Agrikultura, Pekuária, Peska no Floresta (MAPPF) liuhusi Sekretaria Estadu Peska prepara fatin hodi tau vendedór sira-nia ikan iha nia fatin própriu,” Sekretáriu Estadu Peska, Domingos da Conceição dos Santos, informa iha merkadu Taibesi, Tersa ne’e.
Governante ne’e dehan, kustu ba reabilitasaun fatin fa’an ikan iha Taibesi no Manleuana prevee ona iha osan iha tinan 2024 nian, ne’ebé ho kustu $105.000.
Tuir Sekretáriu Estadu, tuir loloos obra ne’e entrega ona maibé mákina bee nian mak avaria, tanba ne’e tenke hadi’a mak foin bele entegra fali.
“Reabilitasaun ne’e kompleta ho nia ekipamentu produsaun ice maker rua ba ita-nia vensedór sira hodi garante katak distribuisaun ikan ba ita-nia konsumidór ne’e ijiene,” nia akresenta.
Biban ne’e, nia apela ba vendedór atu kuidadu fatin no halo operasaun hodi labele hein Ministériu ka Sekretaria Estadu mak halo operasaun.
“Ita prepara no tenke koopera para kontribui no garante ijiene ba fatin ida-ne’e no ba ita-nia konsumidór sira. Ekipamentu ne’ebé instaladu iha merkadu ne’e preparadu nune’e ohin la aban bele entegra ba Ekipa jestaun merkadu munisípiu Dili,” nia katak.
Notísia relevante : Vendedór faan ikan iha Taibesi ejize Governu kria kondisaun ba sira
Iha sorin seluk, Sekretáriu Estadu Asuntu Toponimia no Organizasaun Urbana, Germano Santa Brites Dias, agradese ba SEP tanba bele reabilitasaun ona fatin fa’an ikan.
“Entaun objetivu ohin ne’e halo liña koordenasaun ho Sekretáriu Estadu Peskas, liliu haree ba edifísiu ne’e tanba tinan kotuk ita hadi’a no fase tiha, depois ita-nia vensedór ikan iha tasi ibun mai hotu mai iha ne’e. Depois tinan ida bee laiha no ita-nia vensedór ikan halai fila tiha,” Sekretáriu Estadu katak.
Govenante dehan, reabilitasaun hotu ona hein entrega ba Jestaun Merkadu Munisípiu Dili hodi utiliza.
“Agora ita haree ninia reabilitasaun hotu ona. Ohin ita mai organiza ho Diretór Jestaun Merkadu munisípiu Dili. Nune’e Sekretáriu Estadu entegra xave ba munisípiu Dili no Jestaun Merkadu hodi organiza vensedór ikan sira labele iha de’it tasi-ibun,” Santa Brites, katak.
Nia dehan, atu atrai ema sosa ikan mak tenke hamoos fatin ne’e, labele husik foer iis no dois. Tanba iha uma mós dadeer tenke hamoos no dasa uma, entaun iha merkadu mós hanesan tenke moos, nune’e bele atrai ema sosa ikan.
Diretór Servisu Munisipál Jestaun Merkadu no Turizmu iha Autoridade Munisípiu Dili, Arthur Henriques, agradese ba parte SEP, Pekuária no Sekretaria Estadu Asuntu Toponimia no Organizasaun Urbana (SEATOU) prepara fatin ne’e ba vensedór sira.
“Hahú ohin no aban halo operasaun ba kapitál hodi muda sira ne’ebé fa’an iha espasu públiku mai hotu iha ne’e nune’e haree merkadu ne’e organizadu no moos,” nia hato’o.
Jornalista : Osória Marques
Editora : Julia Chatarina
