BAUKAU, 12 Agostu 2025 (TATOLI)—Sekretariadu Tékniku Administrasaun Eleitorál (STAE) Munisípiu Baukau hala’o atendimentu direta kartaun Biométriku iha Postu Administrativu Baguia ba eleitór hamutuk 1.100.
Administradór Postu Administrativu Baguia, Mário Xavier da Silva esplika atividade referida realiza durante loron-lima hahú iha loron-28 Jullu to’o 03 Agostu iha-ne’ebé hakbesik atendimentu ba komunidade hanesan mudansa kartaun eleitorál ba Biométriku.
“Komunidade entusiazmu tebes troka kartaun ne’e iha postu,” Administradór Postu Administrativu Baguia, Mário Xavier da Silva hateten iha Vila Nova, Baukau, Tersa ne’e.
Mário da Silva louva ho polítika STAE relasiona ho atendimentu direta iha postu administrativu maibé presiza atu aumenta durasaun tempu tanba seidauk kobre totál eleitór sira liuliu inan-amam sira-ne’ebé idade avansada.
Notísia relevante: STAE Baukau prodús ona Kartaun Biométriku 11.133
Nune’e, bá-oin autoridade postu sei kontinua halo koordenasaun ho STAE munisípiu liuliu kontinua halo atendimentu ho durasaun tempu naruk atubele kobre populasaun sira iha suku sanulu.
“Ami mós informa ba diretór atu kobre to’o suku, maibé dehan tuir lei STAE ne’e hala’o atendimentu to’o de’it iha postu,” Mário haktuir.
Entretantu, Postu Administrativu Baguia hamutuk suku sanulu kompostu Alaua Leten, Alaua Kraik, Samalari, Defauasi, Afaloikai, Osohuna, Haekoni, Larisula, Lavateri no Uakala ho totál populasaun hamutuk 12.962.
Jornalista: Natalino Belo
Editór: Xisto Freitas da Piedade
