BOBONARU, 12 Agostu 2025 (TATOLI)—Departamentu Pekuária no Veterinária Diresaun Servisu Munisipál Agrikultura, Autoridade Munisipál Bobonaru rejista suku 18 iha Postu Administrativu Bobonaru maioria sai fatin risku ba tranzmisaun virus Raiva.
Téknika Pekuária no Veterinária destakadu Postu Administrativu Bobonaru, Casimiro Mau informa ekipa sira deteta asu pozitivu Raiva iha Postu Administrativu Bobonaru hamutuk sia (9) iha Suku Leber, Tapo, Oe-eleu, Tebabui, Karabau, Ilatlaun no Suku Bobonaru.
“Suku sira-ne’e mak akontese kazu Raiva. Ita haree fali ba área risku karik, suku sira-ne’e besik malu hotu entaun ita bele dehan katak postu Bobonaru suku 18 ne’e tama hotu iha área risku ba moras Raiva tanba ita-nia sistema haki’ak ladún di’ak, husik asu livre entaun movimentu asu ne’e iha tempu kalan bele la’o to’o distánsia kilómetru 5,” nia informa ba TATOLI iha nia kna’ar fatin, Tersa ne’e.
Notísia relevante: SSK Bobonaru rejista kazu asu tata ema 27, konfirmadu asu rua pozitivu raiva
Casimiro haktuir katak iha Juñu 2025 ne’e konsege halo vasinasaun ba asu hamutuk 308 iha Suku Karabau, Kota-boot, Leber, Tebabui no Tapo, maibé kobertura vasinasaun tun liu tanba komunidade haki’ak-na’in barak mak la koopera.
“Ita-nia komunidade menus konxiénsia. Ami tun ba kampu atu halo vasinasaun laiha kolaborasaun ne’ebé di’ak husi komunidade iha suku barak. Dalaruma uma-kain to’o 100 maibé ita vizita lima ka neen de’it, entaun sai problema boot. Tan ne’e, ha’u husu komunidade atu entrega asu simu vasina. Karik asu-oan ki’ik bele lori mai ami nia fatin iha Postu Bobonaru. Se asu-boot ekipa bele tun ba vasina. Ne’e importante para virus ne’e labele da’et ba ita ema,” nia hakotu.
Iha sorin seluk, Xefe Sentru Saúde Postu Administrativu Bobonaru, Cesaltino Maia reforsa moras ne’e hahú alastra ona tanba hahú husi fulan-Janeiru to’o 12 Agostu 2025 ne’e rejista kazu asu tata ema hamutuk 40. Husi númeru ne’e maioria simu hotu ona vasina antirabiótika.
Atu prevene tranzmisaun virus ne’e, Cesaltino Maia hateten ekipa Sentru Saúde Komunitária Postu Administrativu Bobonaru halo ona soslializasaun medida prevensaun surtu Raiva ba kada suku no fahe mós informasaun liuhusi Igreja hodi konxiensializa komunidade atu luta hakotu korente virus ne’e.
Cesaltino haklaken katak iha tempu badak Administradór Postu Admitrativu Bobonaru ho Komandante Polísia Eskuadra no ekipa veterinária sei aviza tama sai bairru konxiensializa komunidade oferese asu simu vasina no tenke sulan tanba virus ne’e perigu ba vida umana.
Enkuantu, daudaun ne’e estoke Vasina Antirabiótika iha Farmásia SSK Bobonaru Vila sufisiente hela atu atende pasiente mai ho kazu asu tata.
Jornalista: Sergio da Cruz
Editór: Xisto Freitas da Piedade
