DILI, 13 Agostu 2025 (TATOLI)—Komisaun Nasionál Juventude Katólika Timor-Leste (CNJCTL-sigla portugeza) hahú forma komisaun organizadora nu’udár parte preparasaun hodi simu Krúz Joven Internasionál no Jornada Nasionál Juventude.
Diretór Ezekutivu CNJCTL, Padre Francisco Indra do Nascimento Tey-Seran esplika komisaun organizadora inisia husi CNJCTL ne’ebé akumula juventude husi movimentu, asosiasaun independente, grupu dioseze tolu hanesan Baukau, Dili no Maliana inklui universitáriu hodi hanaran ekipa Sinodal iha-ne’ebé trasa planu ligadu ho eventu rua hanesan Krúz Internasionál ho Jornada Nasionál Juventude.
“Haree ba preparasaun sira-ne’e, ami hanoin hela kona-ba preparasaun sira hotu husi ekipa Sinodal ne’ebé Krúz Internasionál ne’e sei vizita fatin rua hanesan Arke Dioseze Dili no Pro-Katedrál Maliana,” Padre Francisco Indra hateten iha edifisiu CNJCTL, Bidau, Dili, Kuarta ne’e.
Padre Indra relata prezensa Krúz Joven Internasionál iha Timor-Leste akontese tanba pedidu direta husi Konsellu Espiskopál Timorense (CET-sigla portugeza) no hetan resposta husi komisaun iha Koreia Súl nune’e tuir kalendáriu sei mai iha loron-23 to’o 30 Agustu.
Nia subliña katak Krúz Joven Internasionál sei to’o iha loron-23 Agostu tuku 13:00 Otl no kontinua kedas halo prosesaun ba Igreja Katedrál Dili hodi halo venerasaun no espezisaun vokasionál inklui misa jerál sei realiza iha loron-24 Agostu ne’ebé sei prezide husi Bispu Dioseze Baukau, Dom Leandro Maria Alves.
“Kona-ba venerasaun ita sei fahe ba grupu no seksaun liturjia mak sei responsabiliza,” Padre Indra esplika.
Aleinde ne’e, Krúz Joven Internasionál sei vizita Pro-Katedrál Maliana iha loron 25 ne’ebé nafatin kontinua ho venerasaun no misa ne’ebé sei lidera husi Bispu Dioseze Maliana, Dom Norberto do Amarál antes kontinua ba Jornada Juventude husi loron-26 to’o 29 Agostu.
Padre Indra hateten programa Jornada Nasionál Juventude sei hala’o liuhosi atividade sira hanesan palestra, workshop, katekeze, asaun karidade, viasakra no sei enserra ho misa hafoin realiza tan aprezentasaun kulturál antes intrega Krúz Joven ba Parókia Remexiu.
“Buat ne’ebé diferente mak Krúz Joven Nasionál sei bá Parókia Remexiu, entretantu Krúz Joven Internasionál sei mai Katedrál Dili,” Padre Indra informa.
Notísia relevante: Autoridade Bobonaru preparadu simu vizita Krúz Joven Internasionál
Durante venerasaun sei loke oportunidade ba juventude jerál inklui sei fahe oráriu ba kada grupu, asosiasaun independente sira, movimentu katólika hamutuk 17 inklui grupu dioseze tolu no joven universitáriu sira.
Krúz Joven Internasionál sei dezloka husi Timor-Leste ba Thailándia iha loron-30 Agostu ne’ebé sei realiza misa enserramentu prezide misa husi Bispu Dioseze Dili, Dom Virgílio Cardeál do Carmo da Silva, SDB.
Entretantu, Komisaun Organizadora Sinodal hamutuk na’in-78 fahe ba seksaun 12 ne’ebé atinje ona pursentu 50 hanesan aleinde enkontru, ekipa sira tuir mós formasaun bazeia ba tema Krúz Joven Internasionál ‘Aten brani ba ha’u manán ona mundu’.
Komisaun organizadora mós kontinua loke rejistrasaun ba juventude ne’ebé iha interese atu partisipa ne’ebé sei taka iha loron-15 Agostu ho alvu hamutuk na’in-554.
Jornalista: Natalino Belo
Editór: Xisto Freitas da Piedade
