DILI, 13 Agostu 2025 (TATOLI)-Jestór Empreza Carisma, Felizito de Sousa Araújo Chang, hateten projetu konstrusaun “Halte” (parajen públiku) 10 ne’ebé estabelese iha sidade Dili atinje ona 96%, falta 4% hodi konklui projetu ida-ne’e no sei entrega ba Governu iha fulan ida-ne’e.
Notísia Relevante: MTK husu empreza Carisma tenke finaliza parajen públiku balun iha kapitál
“Bainhira ami remata ona, ami sei entrega ba Governu tanba ami iha de’it kompeténsia ba obra 9(plementasaun). Enkuantu kona-ba funsionamentu ne’e Diresaun Nasional Transporte Terrestre (DNTT) mak bele regula ona,” Jestór Empreza Carisma ne’e hateten ba Agência Tatoli lihusi telefónika, kuarta ne’e.
Nia hatutan, sira-nia kompañia simu orden hodi konstrui ba Halte 10 ne’e de’it, ne’ebé ho montante $96.000 ba kada halte ida, nune’e presu 100% nian ne’e husi parte Ministériu Transporte no Komunikasaun (MTK) mak hatene liu nia presu loloos ne’e.
Aleinde ne’e, nia dehan, empreza mós komprende kona-ba naran iha halte refere, maibé ne’e la’ós obra kompañia nia, tanba husi dezeñu Kadernu no Planta Enkargu la BoQ ne’e preparasaun husi tékniku Ministeriu Transporte (MTK) nian.
“Ami simu ona orden husi ministériu atu aselera lalais hodi bele entrega iha fulan ida-ne’e. Tuir akordu ho Governu bá projetu kontrusaun halte ne’e fulan neen no planu ba ezekusaun servisu nian tenke atinje 100%,” nia dehan.
Iha terrenu balun la’o tarde, nia dehan, tanba iha problema balun ne’ebé mak sira hasoru maibé nia labele esplika ida-idak tanba ne’e mak servisu la’o tarde, maibé sira sei esforsu hodi ezekuta tuir tempu ne’ebé iha hodi finaliza projetu ne’e.
Kada halte ida kompañia presiza traballadór na’in-ualu (8) maibé bainhira iha fatin konstrusaun halte ne’ebé ladun konsentra ema barak entaun sira presiza de’it ema na’in-neen (6) ka na’in-hitu (7) de’it, no ekipamentu sira-ne’ebé utiliza maiória hola husi Indonézia.
Jornalista : Alexandra da Costa
Editór : Cancio Ximenes
