DILI, 13 Agostu 2025 (TATOLI)-Ministru Ensinu Superiór, Siénsia no Kultura (MESSK), José Honório da Costa Pereira Jerónimo, hatete projetu ba Eskola Ensinu Superiór-RAIZ (ESSE-RAIZ), hosi Universidade Katólika Timór (UCT, sigla portugés) ne’e eduka, inspira no transforma joven ho kualidade.
“Eskola Ensinu Superiór-Raiz reprezenta pasu dahuluk iha misaun nobre atu forma profesór sira ho kualidade ne’ebé iha kapasidade atu eduka, inspira, no transforma moris iha nasaun ida. Tanba jerasaun foun mak futuru ba ita-nia nasaun. Atu iha futuru ne’ebé di’ak liu, ita presiza profesór sira ne’ebé komprometidu no kompetente iha hanorin. Hahú ohin, estudante sira ne’ebé selesionadu iha oportunidade atu asume responsabilidade hodi prepara-an atu sai profesór”, MESSK dehan iha ámbitu inaugurasaun ba projetu ESSE-RAIZ iha UCT, Balide, kuarta-ne’e.
Ministru hatutan UCT akadémika ida-ne’ebé eselente, kualidade ensinu ho lian-portugés no profisionalizmu UCT nian garante katak projetu ne’e sei hetan susesu no husik marka pozitivu iha sistema edukativu.
Notísia relevante: Fulan-oin mak UCT implementa projetu ESE-RAIZ
“Governu liuhosi Ministériu Ensinu Superiór, Siénsia, no Kultura sei kontinua apoia no akompaña didi’ak jornada ida-ne’e hodi garante katak imi ida-idak iha kondisaun di’ak liu atu sai profesór ezemplár, “nia hatutan.
Ministru José husu ba estudante sira atu badinas, aprende ho haraik-án, no nunka haluha faktu katak edukasaun mak xave ba progresu Timor-Leste nian no ida-ne’e sura mós iha imi estudante sira.
Nune’e mós Reitór UCT, Padre Joel Casimiro Pinto, hatutan momentu ida-ne’e la’ós de’it marka inísiu ba faze akadémika foun, maibé mós ba pasu signifikativu ba fururu iha dezenvolvimentu umanu, kulturál, no sientífiku iha Timor-Leste.
“Ohin ami inaugura no ho misaun-ida atu dezenvolve sidadaun krítiku sira, kompetente sira ne’ebé komprometidu ho bem komún, kapaz hodi transforma realidade sosiál Timor-Leste nian. Ita moris iha tempu ida ho dezafiu boot sira”, nia hatete.
Padre Joel Casimiro Pinto akresenta estudante na’in 95 mak aplika ba bolsa estudu ne’e, maibé na’in-50 hetan aprovasaun iha faze eskrita no entrevista.
“Bolseiru na’in-25 ne’e ba siénsia ezata matemátika no fízika, no bolseiru na’in-25 ba siénsia ezata biolojia no kímika. Bolseiru sira ne’e reprezenta kada munisípiu”, nia hatete.
Notísia relevante: Governu kria subvensaun millaun $1 ba implementasaun projetu ESE-RAIZ
Jornalista : Osória Marques
Editora : Rita Almeida
