DILI, 13 Agostu 2025 (TATOLI)—Diretór Servisu Edukasaun Munisipál Dili, Sabino Soares Pereira, informa orsamentu merenda eskolár husi trimestrál datoluk nian ba Edukasaun Munisípiu Dili hamutuk millaun $1-resin maibé seidauk dezembolsadu (sai).
“Orsamentu husi trimestrál datoluk nian ho montante $1.437.451,68. Tan ne’e, espera programa merenda eskolár ne’e la’o, maibé prosesu orsamentu mak seidauk sai,” nia dehan ba TATOLI iha Eskola Sekundária Jerál FINANTIL, Aimutin, Kuarta ne’e.
Ministériu Edukasaun (ME) liuhusi Servisu Edukasaun Munisipál Dili husu ba direjente eskola sira pasiénsia hodi hein orsamentu trimestrál datoluk nian ba implementasaun programa merenda eskolár ne’ebé iha ona prosesu nia laran.
Iha fatin seluk, Xefe Departamentu Dezenvolvimentu Jestaun Eskolár, Cristina Fernandes rekoñese katak orsamentu ba programa merenda eskolár husi trimestrál datoluk ninian sei iha prosesu administrasaun.
“Ezekusaun programa merenda eskolár trimestrál dahuluk no daruak la’o normál, maibé datoluk nian mak sei hein hela orsamentu. Prosesu ne’e ami haruka ona pedidu ba Autoridade Munisipál Dili maibé ita sei hein. Bainhira orsamentu sai ona normalmente merenda eskolár sei la’o hikas,” nia rekoñese.
Notísia relevante: Ezekusaun Orsamentu ba Programa Merenda Eskolár iha progresu
Antes ne’e, Diretór Ensinu Báziku Sentrál Bidau Akadiruhun, Mateus Pinto Tilman hateten eskola ida-ne’e seidauk implementa merenda eskolár ba estudante sira tanba orsamentu seidauk tama iha konta bankária.
“Programa merenda eskolár ne’e, ami seidauk implementa tanba orsamentu seidauk mai. Merenda eskolár ne’e labele kotu-kotu. Ita fó hahán ba labarik sira-ne’e, tenke tuir duni oráriu ne’ebé iha,” Mateus Pinto informa.
Tan ne’e, Mateus solisita ministériu relevante no Prezidente Autoridade Munisipál (PAM) Dili atu prosesa orsamentu hodi implementa fali programa merenda eskolár ba estudante sira.
“Ami husu ba iha PAM no ministériu relevante atu haree ba asuntu ida-ne’e, tanba to’o agora ami seidauk implementa hikas merenda eskolár ba labarik sira,” diretór solisita.
Nune’e mós, Diretór EBF 12 Outubru Tasi-Tolu, Fernando Barreto mós haktuir eskola seidauk simu orsamentu, nune’e seidauk bele implementa merenda eskolár.
“Merenda eskolár to’o agora seidauk kontinua, tanba ami hein hela orsamentu seidauk sai. Bainhira merenda eskolár la’o tiha depoiz paradu fali, ne’e bele iha implikasaun ba estudante sira. Tanba ne’e, ami husu atu orsamentu ne’e transferida ona nune’e bele kontinua implementa fali,” nia sujere.
Tuir Fernando katak programa merenda eskolár ne’e importante tanba ajuda estudante sira iha vontade tuir prosesu aprendizajen.
Nia relata katak kada estudante ne’ebé asesu ba programa merenda eskolár, ho montante dolar amerikanu sentavu 0,35 no menu ne’ebé estudante sira konsume hanesan etu ho naan, manu-tolun no ai-fuan sira hanesan hudi, masán ka apple no seluk tan, depende ba ekipa ne’ebé sosa no fornesedór hein implementa de’it.
Enkuantu, orsamentu 2025 ne’ebé aloka ba implementasaun programa merenda eskolár iha Munisípiu Dili hamutuk $5.137.288,80, ho totál eskola hamutuk 138 kompostu husi pre-eskolár, ensinu báziku, privadu no públiku. Ekipa Jestaun Programa (EJP) ba merenda eskolár ne’e hamutuk 24.
Totál estudante ne’ebé asesu ba merenda eskolár hamutuk 64.040. Kada estudante sei gasta sentavus 0.35 iha kada loron ho totál loron efetivu 191.
Totál orsamentu ne’ebé Governu liuhusi Ministériu Administrasaun Estatál (MAE) aloka ba programa merenda eskolár tinan 2025 nian ba territóriu nasionál ho montante millaun $34.
Jornalista : Osória Marques
Editora : Julia Chatarina
