PNTL Vikeke distribui formuláriu rekrutamentu ba joven na’in-927
VIKEKE, 13 Agostu 2025 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes informa PNTL Munisípiu Vikeke distribui ona formuláriu rekrutamentu ba kadete foun hamutuk na’in-927.
“Prosesu distribuisaun formulária ba kadete sira ami hahú halo abertura iha loron 5 fulan-Agustu. To’o agora ita-nia joven sira mai rejista no foti formuláriu hamutuk 927. Nune’e, iha distribuisaun ne’e ami haree joven sira-nia idade no altura. Kuandu idade liu no altura la to’o sira la simu formuláriu bazeia ba kritériu konkurru nian,” António Rego ba TATOLI iha ninia kna’ar fatin, Beskem, Vikeke, Kuarta ne’e.
Notísia relevante: Komisaun rekrutamentu rejista ona kandidatu asesu formuláriu 14.595
Komandante PNTL Munisípiu Vikeke ne’e hatutan husi númeru totál 927, joven sira-ne’ebé altura no idade prenxe rekizitu hamutuk 768 kompostu husi mane na’in-587 no feto na’in-181, joven sira-ne’e idade no altura la to’o hamutuk na’in-159.
“Horisehik mós ita hahú fali simu dokumentu husi ita-nia joven sira, maibé sekretáriu sira halo verifikasaun ne’e balun dokumentu la kompletu nune’e haruka sira fila hodi halo kompletu hafoin mai hatama fali,” nia haktuir.
Aleinde ne’e, António dehan, dezafiu ne’ebé kandidatu sira hasoru mak rejistu kriminál tanba rejistu kriminál ne’e iha limitasaun validade tanba balun hela fulan ida ka rua mate ona ne’ebé sira tenke ba halo renovasaun.
“Kritériu ba rejistu kriminál ne’e tenke moris fulan neen (6). Nune’e, ba dezafiu sira-ne’e ami koordena ona parte notariadu hodi atende ita-nia joven sira atu trata rejistu kriminál. Ami mós halo koordenasaun ho Prezidente Autoridade Munisipál Vikeke hodi fó orientasaun ba xefe suku no administradór sira hodi asina karta deklarasaun sira, atu joven sira bele konkorre ba vaga PNTL nian,” nia hato’o.
Jornalista: Vitorino Lopez da Costa
Editór: Xisto Freitas da Piedade
