DILI, 13 Agostu 2025 (TATOLI)- Ministru Justisa, Sergio Hornai, hatete tinan-oin Diresaun Servisu Rejistu Notariadu (DSRN) sei aplika pagamentu ba atendimentu públiku hanesan trata Billete Identidade, Sertidaun Moris, Rejistu Kriminál inklui Sertidaun Erdeiru.
Governante ne’e esplika, Ministeriu Justisa foti desizaun ne’e bazea ba dekretu-lei númeru 46/2011, 19 Outubru nian ne’ebé ko’alia kona-ba rejime emolumentár ba rejistu no notariadu.
“Ne’e lei mak hateten, ha’u mai atu implementa no interpreta lei ne’e hodi hatur buat ne’e la’o tuir nia fatin”, Ministru hatete ba TATOLI iha nia kna’ar fatin Kolmera, kuarta-ne’e.
Nia dehan, razaun Governu foti desizaun ne’e atu husu populasaun bele kontribui ba kofre Estadu liuhusi lei ne’e ba atendimentu públiku iha Diresaun Servisu Rejistu Notariadu nian.
“Tempu ona. Ita haree ba Timor-Leste ukun-án tinan 23 ona, ita hanesan Estadu presiza mós partisipasaun komunidade ninian, emolumentu katak bainhira ita atu trata dokumentu ida, ita iha obrigasaun kontribui emolumentu ba sosiedade”, katak nia.
Nia dehan, husi rejime jurídiku emolumentár ba rejistu no notariadu ne’e klaru, hahú artigu 10, 11 no 12 ne’e, sidadaun hotu-hotu atu trata dokumentu tenke kontribui emolumentu tuir presu ne’ebé Diresaun Servisu Notariadu sei define tuir lei.
Notísia relevante: Rejistu Notariadu Bobonaru rekolla reseita $43,525 iha trimestre dahuluk
Jornalista : Natalino Costa
Editora : Rita Almeida
