DILI, 14 Agostu 2025 (TATOLI)—Autoridade Administrasaun Munisipál (AAM) Baukau propoin orsamentu adisonál hamutuk $16.507.353 ba Komité Revizaun Orsamentál (KRO).
Prezidente Autoridade Munisipál (PAM) Baukau, Veneranda Eurico Lemos Martins esplika razaun husu orsamentu adisonál tanba iha Orsamentu Jerál Estadu (OJE) tinan-2025 AAM Baukau sofre ona korte ba saláriu vensimentu hamutuk pursentu 16 nune’e iha aprezentasaun AAM husu ba KRO atu konsidera repoin fali orsamentu pursentu 16 ba saláriu vensimentu nune’e bele paga funsionáriu sira hamutuk na’in-308.
“Se sira halo korte ba ida-ne’e entaun ita-nia maluk funsionáriu sira sei sofre ba saláriu,” Prezidente Autóridade Munisipál (PAM) Baukau informa ba TATOLI iha Ministériu Finansa, Aitarak-Laran, Kinta ne’e.
Veneranda rekomenda bainhira atu korte presiza bazeia ba númeru funsionáriu no halo analiza ba dadus funsionáriu hanesan idade reformada no iha faze reformada maibé Autoridade Munisipál hotu presiza fornese informasaun detallada kona-ba numéru funsionáriu nune’e KRO tetu hodi aloka ba rúbika saláriu vensimentu.
Aleinde ne’e, Eis deputadu iha Parlamentu Nasionál ne’e relata OJE tinan-ne’e mós AAM Baukau sofre ona korte ba orsamentu bens serbisu hamutuk pursentu 25 nune’e kontinua husu ba KRO atu konsidera tanba sei responde ba alokasaun kombustivel no funsionáriu kazuál ne’ebé kolokadu iha ambulánsia funerária.
Autóridade Munisipál Baukau hetan alokasaun tetu fiskál hosi Ministériu Finansas ho montante $10.388.011 hodi aloka ba saláriu vensimentu $2.363.048, kapitál menór $0, kapitál dezenvolvimentu 0, transferénsia públika $7.445.580 no bens no servisu $579.383.
Husi orsamentu tetu fiskál referidu, AAM Baukau konsidera la sufisiénte nune’e propoin orsamentu adisionál hamutuk $16.507.353 ne’ebé sei aumenta ba alokasaun saláriu no vensimentu $2.173.093, kapitál menór $2.341.995, transferénsia públika $1.005.826, kapitál dezenvolvimentu $10.716.071 no bens no servisu $270.378.
“Ami husu ona ba KRO kuandu atu halo korte ba projetu sira-ne’ebé hetan aprovasaun iha Konsellu Konsultivu Munisipál (KKM) presiza konsulta ho autoridade kona-ba projetu ne’ebé mak prioridade liu atu halo iha tinan-2026,” Veneranda Lemos akresenta.
Eis governante ne’e konsidera nesesária tebes alokasaun orsamentu ba kapitál menór tanba iha tinan-2026 kada munisípiu sei halo preparasaun ba kondisaun mínima hodi simu implementasaun poder lokál no desentralizasaun administrativa.
Entretantu, totál orsamentu ne’ebé Autoridade Baukau propoin ba KRO hamutuk $26.896.364, hodi aloka ba saláriu no vensimentu $4.536.141, kapitál menór $2.341.995, transferénsia públika $8.451.406, kapitál dezenvolvementu $10.716.071 no bens no servisu $849.761.
Jornalista: Natalino Belo
Editór: Xisto Freitas da Piedade
