Autoridade Administrativa Ataúru husu adisionál millaun $4 iha KRO
DILI, 14 Agostu 2025 (TATOLI)—Autoridade Administrativa Ataúru propoin tan orsamentu adisionál ba tinan 2026 nian iha Komité Revizaun Orsamentu (KRO) hodi bele konsidera.
“Ami husu adisionál ne’e atu reforsa atividade ka programa prioridade iha tinan oin,” Autoridade Administrativa Ataúru, Mateus Belo, hato’o ba jornalista sira, iha resintu Ministériu Finansa (MF), Aitarak-laran, Kinta ne’e.
Orsamentu adisionál atu tau tan iha kategoria saláriu no vensimentu $380.000 hodi responde ba funsionáriu sira tanba daudaun ne’e funsionáriu permanente 200 no funsionáriu kazuál 200.
“Ita difísil atu atende serbisu hotu-hotu,”nia akresenta.
Nia argumenta, ba kategoria bem no servisu husu tan adisionál $400.000-resin ne’e hodi responde ba atividade eventuál ne’ebé importante tanba Ataúru presiza dezenvolve atividade barak.
Orsamentu inisiál ba transferénsia públika ho montante $600.000-resin, nune’e husu tan $80.000 hodi apoiu atividade fornesimentu dadus iha suku.
Notísia relevante : PM Xanana inaugura balkaun úniku iha Ataúru
Enkuantu, ba kategoria kapitál menór, Ataúru propoin tan $450.000 hodi responde ba preokupasaun Ataúru.
“Tanba viajen mai Dili liuhusi tasi nune’e presiza sosa ró hodi fasilita viajen Dili-Ataúru,” nia katak.
Antes ne’e, MF distribui pakote fiskál tinan 2026 nian ba Autoridade Administrativa Ataúru ho montante millaun $15, ne’ebé montante ne’ela inklui kapitál menór no kapitál dezenvolvimentu hodi implementa projetu 15 iha suku lima iha Ataúru, ne’ebé kada suku hetan projetu tolu.
Nune’e mós, ba programa esensiál sira hanesan saúde, edukasaun no infraestrutura bázika estrada no konsentra ba atividade xave hanesan ekonomia no turizmu liga ba área kosteira no kulturál.
Iha Orsamentu Jerál Estadu (OJE) 2025 nian, Autoridade Administrativa Ataúru simu orsamentu ho montante $2.550.389, fahe ba kategoria saláriu no vensimentu $620.516, bens no servisu $631.545, transferénsia públika $613.305, kapitál menór $200.000, no kapitál dezenvolvimentu $ 485.023 hodi implementa programa prioridade sira hanesan infraestrutura bázika inklui asuntu edukasaun no sosiál.
Jornalista : Osória Marques
Editora : Julia Chatarina
