Bebé foin moris tenke konsumu de’it susubeen inan nian durante fulan neen

OEKUSI, 14  Agostu 2025 (TATOLI) – Vise-Ministru ba Fortalesimentu Institusionál, José dos Reis Magno,  kinta ne’e, realiza kampañia nasionál semana mundiál susubeen inan nian iha sentru saúde Kiomaonteko sub-rejiaun Pante Makasar Rejiaun Administrativa Espesiál Oekusi Ambeno (RAEOA) ho tema ‘prioritiza fó susuben inan, atu kria sistema apoia sustentavél’.

Kampañia semana mundiál ne’e hahú ho marsa saudavél hahú husi rotunda Aeroportu Rota do Sandallo, hodi fó avizu ba komunidade sira iha Oekusi, atu tau matan ba bebé ne’ebé foin moris tenke konsumu de’it susubeen inan nian durante fulan neen, nune’e bele haforsa nutrisaun saúde no kombate má-nutrisaun.

Notísia relevante: https://tatoli.tl/2023/11/14/horta-husu-governu-atentu-ba-kombate-ma-nutrisaun-iha-tl/

Vise-Ministru ba Fortalesimentu Institusionál, José dos Reis Magno, sente orgullu ho iha momentu espesiál ida-ne’e, hodi selebra semana mundiál susubeen inan nian, iha Oekusi ho lema tinan ‘harii nasaun saudavel hahú ho fó susubeen inan ba bebé’.

“Semana ida-ne’e nu’udar oportunidade atu ita reafirma importánsia, vitál kona-ba susubeen inan, iha dezenvolvimentu saudavel ba ita-nia oan sira, ne’ebé sei sai ita-nia futuru, iha ita-nia rejiaun espesiál Oekusi no ita nia Nasaun,” nia afirma iha ámbitu selebrasaun ne’ebé hala’o iha sentru saúde Kiomaonteko, ohin.

Governante esplika, katak, fó susuben inan, nu’udar prátika simples, naturál, maibé iha nia impaktu bo’ot ba saúde nia bebé ka labarik inan no família ninian. Tanba susubeen inan fortalese sistema imunitáriu bebé sira, proteje sira husi moras, no promove vínkulu afetivu esensiál ba kreximentu integrál ba bebé sira.

“Nu’udar Governu, ita renova ita-nia kompromisu hodi apoia inan hotu-hotu iha RAEOA, kria kondisaun adekuada, atu sira bele fó sira-nia susubeen ho seguru, respeitu no trankuilidade, sai mós papél komunidade nian, hodi promove ambiente sira favoravel no apoia inan sira iha prosesu ida-ne’e, ha’u halo apelu ba hotu-hotu bá profisionál saúde, dirijente sira hotu, atu bele hamutuk iha komunitáriu, família no sidadaun atu bele hamutuk, asaun konkretu hamutuk ita bele harii nasaun saudavél,” nia afirma.

Iha fatin hanesan, Sekretariu Regional ba Asuntu Saude, Luís de Jesus Neno, konsidera ho ema ohin ne’e, hatudu katak susesu iha fó susubeen la’ós de’it responsabilidade inan ida nian maibé responsabilidade ita hotu nian, atu nafatin fó hanoin, promove no hala’o asaun sira hodi kria no apoiu inan fó susubeen ho susesu.

Nia komenta katak, inan nia susubeen mak ai-han di’akliu hotu, kontein nutriente hotu ne’ebé bebé fulan neen dahuluk, iha sira-nia moris no kontinua to’o tinan rua. Susubeen inan mós sira presiza ba ajuda kreximentu no dezenvolvimentu ne’ebé saudavel iha benefisíu tempu-naruk ba saúde komunidade.

Nia deklara tan, susesu fó susubeen inan ne’e presiza sistema apoiu ne’ebé forte no sustentavel, hahú husi família, profisionál saúde, fatin serbisu to’o polítika Governu lokál. Apoiu ne’e bele fornese koñesimentu, fasilidade hadomi kosok-oan no inan, tempu lisensa maternidade sufisiente, no sala laktasaun ne’ebé di’ak iha fatin serbisu no fatin públiku, presiza duni kria kondisaun sira hanesan ne’e.

“Ami anota katak tenke apoia ambiente ne’ebé amigavél hodi suporta (apoia) fó susu susesu, nune’e bele hadi’ak liutan kreximentu no dezenvolvimentu oan-doben Oekusi, nia futuru no hanesan pasu ida ba hamenus desnutrisaun iha RAEOA. Nu’udar Autoridade apresia ba profisionál saúde sira no voluntáriu saúde komunitária ka Grupu Suporta Inan, ho esforsu tomak hodi kontinua nafatin promove susuben inan ba komunidade,” nia katak.

Notísia relevante: https://tatoli.tl/2023/02/27/ong-him-hasae-konesimentu-grupu-suporta-inan-redus-ma-nutrisaun-iha-raeoa/

Observasaun jornalista Ajénsia TATOLI, iha biban ne’e, mós Ministériu Saúde fahe prémiu no sertifikadu ba labarik nutrisaun di’ak liuhusi fó susubeen inan nian no partisipa iha kampañia nasionál mai husi parsériu sira hanesan Organizasaun Saúde Mundiál (OMS), Departement of Foreign Affairs and Trade (DFAT).

Jornalista: Abílio Elo Nini

Editór: Rafael Ximenes de A. Belo