CNE kria sertame ba estudante Eskola Sekundária Paralela Olokasa
VIKEKE, 14 Agostu 2025 (TATOLI)—Komisaun Nasionál Eleisaun (CNE-sigla portugeza) diversifika atividade edukasaun sívika hodi hamosu kompetisaun sertame ba estudante Eskola Sekundária Paralela Olokasa, Suku Uaguia, Postu Administrativu Ossú, Munisípiu Vikeke.
Iha realizasaun kompetisaun sertame, Komisáriu CNE Destakadu Munisípiu Vikeke, Olávio da Costa Monteiro Almeida hateten atividade sertame ne’e realiza tanba CNE halo kooperasaun ho koordendór Eskola Sekundária Paralela Olokasa Uaguia.
“CNE opta mekanizmu balun atu diversifika atividade sira-ne’ebé ami hala’o hanesan enkontru komunitáriu, diálogu no debate públiku. Alende ne’e, CNE inisiativa realiza sertame ba estudante sira sai hanesan faze teste ida ba estudante sira atu ita bele haree koñesimentu estudante sira-nian ba prosesu eleisaun nian,” Olávio ba jornalista sira iha Uaguia, Kinta ne’e.
Olávio haktuir matéria ba sertame nian prepara husi CNE no haruka estudante sira estuda durante semana ida ka rua, hafoin realiza sertame referidu.
Notísia relevante: CNE sosializa eleisaun munisipál ba estudante Canossa Ossú
Nia esplika prémiu husi kompetisaun ne’e mak kadernu, lapizeira inklui osan uitoan ba estudante manán-na’in sira-ne’ebé hola parte iha sertame.
Nia subliña matéria ba sertame ne’e kompostu husi istória internasionál, istória nasionál, lei eleisaun, lei desentralizasaun poder lokál, kódigu penál ne’ebé liga krime eleitorál, koñesimentu jerál ba Munisípiu Vikeke no postu administrativu sira.
Iha fatin hanesan, Koordenadór Eskola Sekundária Paralela Uaguia, Eurosio Soares Ruas hato’o agradesimentu ba CNE ne’ebé oferese kompetisaun sertame ba estudante sira hodi bele prepara ba futuru.
“Nasaun atu la’o bá-oin, presiza liuhusi edukasaun. Tanba ne’e, ami hato’o obrigadu ba CNE ne’ebé apoiu finansamentu ba realizasaun sertame ba estudante sira. Liuhusi sertame ne’e bele ajuda ona estudante hodi hasa’e sira-nia koñesimentu ba eleisaun sira,” nia hato’o.
Atividade sertame ne’e, partisipa husi estudante eskola paralela Olokasa hamutuk grupu neen (6). Kada grupu em na’in-tolu (3).
Serimónia abertura ba kompetisaun referida asiste husi autoridade lokál, CNE nasionál, estudante Olokasa no profesór sira.
Jornalista: Vitorino Lopez da Costa
Editór: Xisto Freitas da Piedade
