MI klarifika proposta lei rejime jurídika arte-marsiál
DILI, 14 Agostu 2025 (TATOLI)-Ministru Interiór, Francisco da Costa Guterres, hateten Ministériu Interiór foin daudaun aprezenta proposta konaba rejime jurídika arte-marsiál ba Konsellu Ministru.
Nia dehan, proposta lei ne’e hetan ona apresiasaun ka aprovasaun husi Konsellu Ministru no sei haruka ba Parlamentu Nasionál hodi kontinua haree hodi halo aprovasaun, nune’e bele hetan promulgasaun husi Prezidente Repúblika.
“Proposta lei ne’e ninian karater venkulativa, projetu lei ne’e atu halo prevensaun komflitu no oinsá atu envolve sira husi arte-marsiál ba atividade prodututiva hodi kontribui ba dezenvolvimentu nasionál”, Francisco hateten ba TATOLI iha Kuartél Unidade Espesiál Polísia (UEP), kinta-ne’e.
Nia hatutan, Governu halo proposta lei ne’e hodi kontrola didiak sira-nia atividade la’ós treinu uza ba krime, maibé treinu atu kontribui ba buat ruma. “Ita hakarak envolve arte ba atividade produtuva, ida-ne’e mak ita hakarak. La’ós loron-kalan baku-malu, baku-malu ne’e la manán buat ida, ó treinu ne’e atu kontribui ba buat ruma hanesan desportivu ne’e mak ita dehan produtivu, se ita ba treinu mak loron-kalan hein malu de’it ne’e lá’os produtivu”.
Governante ne’e dehan, proposta lei ne’e atu halo prevensaun, punisaun, no envolve arte-marsiál ba dezenvolvimentu nasionál ne’e mak objetivu proposta lei ne’e.
Notísia relevante: KM aprova Proposta Lei rejime jurídiku arte marsiál
Jornalista : Natalino Costa
Editora : Rita Almeida
