DILI, 14 Agostu 2025 (TATOLI)-Komandante Komponente Navál, Komodoro Higino das Neves, hateten prezensa ró forsa auto-defeza ne’ebé hanaran “OHsumi” mai Timor-Leste atu hametin liutan kooperasaun defeza no militár entre Timor-Leste ho Japaun.
“Ita-nia ofisiál militár barak mak akaba estudu iha akadémia militár Japaun. Tanba ne’e, ró ne’e ninian vizita importante, vizita ne’e sira hakarak hatudu sira-nia vontande servisu ho Timor”, Komorodoro Higino ba jornalista sira hafoin simu ró militár auto-defeza husi Japaun ne’ebé para iha tasi-klaran área Portu Dili, kinta-ne’e.
Ró ne’e atraka ohin tuku 9:30, tula forsa komponente Navál Japaun na’in-178, husi númeru ne’e balun de’it mak mai iha Portu Dili, tanba para iha tasi klaran, labele atraka besik Portu Dili ho razaun medida ró ne’e boot.
Tuir ajenda ró Ohsumi sei estadia iha Timor-Leste durante loron-tolu hahú husi 14-16 Agostu 2025. Kapitaun ró forsa Naval Japaun ne’e sei hasoru Ministru Defeza, Kontra Almirante Donaciano Costa Gomes Pedro Klamar Fuik, Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek, hodi reforsa kooperasaun bilaterál entre TL no Japaun iha kooperasaun kuadru defeza no militár.
Seromonia resepsaun ne’ebé sei halo iha ró, ne’ebé partisipa husi entidade nasaun Timor-Leste nia hodi vizita ró ne’e, molok ró forsa Naval Japaun kontinua viajen ba illa Pasífiku.
Liuhusi Ministru Defeza no naran Komandu F-FDTL nia naran, Komorodo agradese ba vizita ne’e. “Ita sente haksolok no fuan nakloke tanba Japaun nia prezensa bele tulun ita-nia forsa sira hodi hakbiit koñesimentu, tanba vizita ida importante ba ita no ba sira”, nia afirma.
Nia dehan, prezensa ró ne’e lori matériál militár nian hodi apoiu F-FDTL iha ámbitu ezersísiu Coopertion Afloat Readines and Traning (CARAT) 2025 ne’ebé halo iha tempu badak.
Embaixadór Japaun ba Timor-Leste, Kimura Tetsuya, hateten ró militár Japaun ninian prezensa iha Timor-Leste atu hametin liután kuadru kooperasaun defeza no militár ho Japaun.
Nia dehan, ró ne’e tuir hela ezersísiu militár, nune’e sira hakarak halo viajen mai liu Timor-Leste molok sira kontinua viazen ba fatin seluk.
Nia dehan ró ida ne’e nudar ró ne’ebé minimiza materiál ba ezersísiu militár transporta ekipamentu hodi responde ba situasaun dezastre sira iha Japaun inklui rai seluk.
Diplomata Japaun ne’e haktuir ró Ohsumi ne’e vizita ona Timor-Leste ba dala rua, vizita dahuluk iha 2002 no vizita daruak 2025.
Notísia relevante: Ró JS MURASAME vizita TL hodi hametin kooperasaun iha área defeza
Jornalista : Natalino Costa
Editora : Rita Almeida
