DILI, 14 Agostu 2025 (TATOLI)-Governu liuhusi Ministériu Edukasaun (ME) sei selebra termu aseitasaun ho professór Bolsa Kandidatu (BK) hamutuk 187 antes partisipa formasaun semana-ida iha Rairobo.
“Segunda semana oin, ami sei fó sai xamada ba ita-nia manorin bolsa kandidatu ne’ebé rekrutadu iha tinan 2024 hamutuk na’in-187 atu prenxe termu aseitasaun molok tuir formasaun semana-ida iha Rairobo”, Diretór Rekursu Umanu ME, João Amaral, ba jornalista sira iha Vila Verde, kinta-ne’e.
Depois formasaun mak ministériu sei pose hodi koloka ba nivel ensinu báziku ne’ebé sira aseita atu koloka.
“Ita sei koloka tan 187, entaun kuaze 900-resin de’it ona mak sei iha bolsa, ne’ebé mak agora sei iha bolsa nian laran, tanba ne’e ba sira-ne’ebé mak iha bolsa ne’e, tinan oin ita sei koloka tuir manorin sira ne’ebé reforma obrigatóriu, tuir lista funsaun públiku katak ministériu edukasaun mak ho volume ne’ebé boot”, katak nia.
Dadus ministériu koloka ona manorin kuaze 2.000-resin husi bolsa kandidatu tinan 2024, ba eskola pre-eskolár no ensinu báziku iha teritóriu. Enkuantu dadus tinan oin bainhira komisaun funsaun públika aplika reforma obrigatóriu ba manorin 3.800.
Diresaun Rekursu Umanu mós identifika ona manorin ne’ebé ho kondisaun moras kuaze 254, nune’e manorin sira ne’ebé sei iha bolsa laran, sei halo kolokasaun hotu.
Notísia relevante: ME rejistu ona kandidatura ba vaga sekundáriu hamutuk 16.437
Jornalista : Osória Marques
Editora : Rita Almeida
