BOBONARU, 14 Agostu 2025 (TATOLI)—Korpu Bombeiru hamutuk ho ekipa téknika Eletricidade de Timor-Leste, Empreza Públika (EDTL, E.P.) sei tesi ai iha estrada-ninin ne’ebé nia sanak tama ba estrada laran hahú husi Ponte Loes ba to’o Igreja Parókia Bobonaru nune’e labele perturba atividade prosesaun illas Krúz Joven Internasionál husi Koreia mai Munisípiu Bobonaru.
“Ami apoia 100%. Ba ami mak ne’e, importante iha materiál hanesan sensór, ema atu limpeza ai hahú husi Ponte Loes ba to’o Bobonaru,” Komandante Bombeiru Munisípiu Bobonaru, Eusebio Fernandes da Cruz informa ba TATOLI iha kna’ar fatin, Kuarta ne’e.
Aleinde ne’e, Koordenadór EDTL Delegasaun Territoriál Munisípiu Bobonaru, Mário de Jesus Soares reforsa ekipamentu no tékniku sira preparadu tanba tesi ai iha dalan-ninin ne’e kabe ba servisu EDTL nian duni.
Notísia relevante: CNJCTL kontinua halo preparasaun simu Krúz Joven Internasionál
Nia hatutan iha tempu badak sei koloka mós tékniku tun ba terrenu normaliza liña média no baixa-tensaun nune’e labele akontese avariadu ho tempu naruk no EDTL mós sei apoia fiu no lampu hodi instala iha fatin Krúz Joven Internasionál.
Maski nune’e, ekipa seidauk tun ba terrenu tanba seidauk hetan orientasaun husi Komisaun Organizadora.
Jornalista: Sergio da Cruz
Editór: Xisto Freitas da Piedade
