FAO apoiu prodús karau susu-been iha Sentru Ratahu
VIKEKE, 15 Agostu 2025 (TATOLI)—Reprezentante Food Agriculture Organization (FAO), Paula Lopez da Cruz informa FAO sei apoiu Ministériu Agrikultura, Peska, Pekuária no Floresta (MAPPF) prodús karau susu-been iha Sentru Ratahu, Suku Uma-Ua’in Kraik, Postu Administrativu Vikeke Vila, Munisípiu Vikeke.
“Programa produsaun karau susu-been ne’e MAPPF kolobora ho FAO tanba Governu ninia prioridade hakarak promove karau susu-been. Tanba ne’e, ami (FAO) fó asisténsia téknika durante tinan rua, hahú husi 2025 to’o 2026,” Paula hateten ba TATOLI iha Sentru Ratahu, Sesta ne’e.
Paula relata planu produsaun karau Timor nia susu-been Governu prepara ona fatin hanesan uma, luhan no fasilidade sira seluk iha Sentru Ratahu.
“Ami sei suporta espesialista ba karau susu-been. Ne’ebé, durante tinan rua ne’e, ami sei fó asisténsia téknika para oinsá sentru ida-ne’e sai sentru ba formasaun atividade karau susu-been nian. Aleinde ne’e, ami fó apoia peritu no ami mós sei servisu hamutuk ho tékniku sira husi MAPPF hodi prepara hahán ba karau tanba karau sira-ne’e ita la husik livre, ne’ebé ita tenke fó han ho didi’ak nune’e prodús susu-been ho kualidade,” nia subliña.
Notísia relevante: MAPPF inaugura konstrusaun uma karau susu-been iha Sentru Ratahau
Paula esplika apoiu FAO ba produsaun susu-been sei halo diversifikasaun susu-been sai fali produtu seluk hanesan keiju no dose.
“Ba diversifikasaun karau susu-been ne’e ami fó formasaun kona-ba valór susu-been sai produtu seluk. Ministériu estabelese ona sentru karau susu-been lima, iha-ne’ebé husi sentru sira-ne’e sei konsentra iha Ratahu hodi aprende prosesu sira hanesan kuidadu karau, fó han karau no diversifikasaun karau susu-been,” nia esklarese.
Entretantu, iha Sentru Ratahu daudaun ne’e karau Timor hamutuk 11 no traballadór ne’ebé tau-matan ba karau no sentru hamutuk na’in-17.
Jornalista: Vitorino Lopez da Costa
Editór: Xisto Freitas da Piedade
