VIKEKE, 15 Agostu 2025 (TATOLI)–Ministériu Agrikultura, Peska, Pekuária no Floresta (MAPPF) no parseiru Food Agriculture Organization (FAO) hamutuk ho Autoridade Munisipál Vikekek inaugura fasilidade uma ba karau susu-been, iha Sentru Ratahu, Suku Uma-Ua’in Kraik, Postu Administrativu Vikeke Vila.
Iha inaugurasun ne’e, Ministru Agrikultura, Peska, Pekuária no Floresta, Marcos da Cruz haktuir tempu Portugés ema barak iha karau Timor ne’ebé bele prodús karau susu-been, tanba ne’e MAPPF planeia prodús karau susu-been hodi redús malnutrisaun iha Timor-Leste.
“Ita hatene katak iha problema malnutrisaun, nune’e ita tenke hadi’a. Maneira ida mak ita aumenta proteina ba oan sira hodi hadi’a nutirisaun. Tanba ne’e mak ita haree rekursu lokál hanesan karau Timor ne’ebé ita hatama ona iha sentru Ratahu hodi prepara ba produsaun karau susu-been,” Marcos da Cruz hateten iha Sentru Ratahu, Sesta ne’e.
Governante ne’e dehan Timor-Leste iha rekursu karau Timor ne’ebé bele prodús karau susu-been, tanba ne’e MAPPF sosa karau hamutuk 55 hodi koloka ba sentru lima, iha-ne’ebé kada sentru ida hetan karau timur 11 kompostu husi karau inan-sanulu (10) no aman ida.
“Karau sira-ne’e ita tau ona iha sentru sira hodi ita prepara ba produsun karau susu-beben. Bá-oin ita kontinua hadi’a kondisaun sira hodi prepara prodús susu-been no halo diversifikasaun karau susu-been, atu susu-been bele iha valór hodi ajuda ita-nia ema ba hadi’a nutrisaun,” nia hato’o.
Notísia relevante: MAPPF lansa programa IA ba karau vaka iha Vikeke
Iha fatin hanesan, Sekretáriu Estadu Pekuária, José Vieira de Araújo hateten MAPPF lansa ona fatin ba produsaun karau susu-been iha Sentru Ratahu ba preparasaun karau hodi prodús susu-been.
“Fasilidade hanesan uma ba karau Timor daudaun ne’e ita hatama ona karau Timor iha laran. Bainhira karau sira-ne’e oan iha ita bele prodús ona karau susu-been,” nia akresenta.
Kona-ba fasilidade karau susu-been ne’ebé Governu liuhusi MAPPF prepara iha Sentru Ratahu mak hanesan uma ba karau, kuda duut karau nian inklui bee. Husi fasilidade sira-ne’e gasta orsamentu hamutuk rihun $98.
Serimónia lansamentu ba karau susu-been ne’e partisipa husi Sekretáriu Estadu Floresta (SEF), Sekretáriu Estadu Pekuária (SEP), Sekretáriu Estadu Peska (SEP), funsionáriu MAPPF, autoridade lokál no komunidade.
Jornalista: Vitorino Lopez da Costa
Editór: Xisto Freitas da Piedade
