DILI, 15 Agostu 2025 (TATOLI) – Ministériu Agrikultura, Pekuária, Peska no Floresta (MAPPF), liuhusi Diresaun Nasionál Agrikultura, Ortikultura no Protesaun Planta sosa ona tratór fila-rai hamutuk unidade 22.
Diretór Nasionál Agrikultura, Ortikultura no Protesaun Planta, Lúcio Nuno, informa katak ministériu planeia iha tinan ne’e atu halo akizasaun ba tratór 25, maibé empreza hatama de’it 22.
“Orsamentu ne’ebé ita prevee ba tinan ne’e atu sosa tratór 25 hamutuk rihun $850, maibé kompañia hatama de’it 22, entaun selu de’it rihun $600-resin. Tratór sira ne’e daudaun iha hotu ministériu, hein halo inspesaun hotu mak distribui ba munisípiu sira”, Lúcio Nuno dehan ba Tatoli, ohin.
Nia esplika katak objetivu ministériu nia kada tinan sempre aloka orsamentu ba sosa tratór sira ne’e, tanba hakarak apoia agrikultór sira hasa’e produsaun hare iha rai-laran, nune’e futuru labele depedénsia maka’as ba importasaun.
Tratór sira ne’e sosa husi empreza Bandido Qualidade, ne’ebé halo akizisaun iha Indonézia. Tuir planu, ministériu sei fahe bá agrikultór iha munisipiu Aileu, Baukau, Vikeke, Manatutu, Manufahi no Dili.
Totál tratór foun ne’ebé ministériu sosa hahú husi 2023 to’o 2024 hamutuk 76, husi totál ne’e multifunsaun haat, restu ne’e mákina fila-rai no ko’a hare nian.
Notísia relevante: Hasa’e produsaun agríkola, MAPPFF distribui tratór ba sentru peskiza tolu
Jornalista: Arminda Fonseca
Editora: Maria Auxiliadora
