DILI, 29 Abríl 2025 (TATOLI) – Ministériu Agrikultura, Pekuária, Peskas no Floresta (MAPPF) liuhusi Programa Sustainable Agriculture Productivity Improvement Project (SAPIP) – Projetu Hadi’a Produtividade Agrikultura Sustentavel, distribui tratór tolu ba sentru peskiza sira hodi fasilita serbisu iha terrenu no hasa’e produsaun.
Sentru peskiza tolu ne’ebe ne’e mak hanesan, Sentru peskiza Loes, Sentru peskiza Betanu no Sentru peskiza Darasula no totál gastu ba tratór ne’e hamutuk kuazé $120 mil.
Ministru Agrikultura, Pekuária, Peskas no Floresta, Marcos da Cruz informa katak atividade entrega tratór ne’e hodi ajuda halo melloria ba atividade peskiza, ne’ebé tutela iha Diresaun nasionál peskiza no lojístika ministériu nian, hodi tau matan ba sentru peskiza tolu hanesan Betanu, Loes no Darasula.
“Sentru sira-ne’e, estabelese kedas iha tempu Governu antes nian. Sentru sira-ne’e ita presiza funsiona no peskiza sira-ne’ebé halo iha ne’ebá ne’e mak hanesan esperimentasaun kona-ba produtus lokais”, Ministru ne’e hateten ba jornalista sira iha salaun enkontru MAPPF, Komoro, Dili, ohin.
Governante ne’e esplika, iha Sentru Loes eziste ho produtu batar, iha Betanu mós hanesan ne’e, no parte Darasula iha fore-rai, tanba-ne’e fatin sira-ne’e presiza prepara kria kondisaun rai ne’e ho di’ak para halo fini.
“Nune’e ita presiza tratór. Ne’e mak ohin ita iha ne’e, bele fó testamuña katak liuhusi programa SAPIP, bele aumenta produsaun produtividade agrikultura nian”, nia garante.
Notísia relevante:Agrikultura RAOEA fasilita tratór unidade haat bá fila-rai iha natar Nunuheno
Iha fatin hanesan, Diretór Nasionál Peskiza no Estatístika, Cesár José da Cruz, agradese ba apoiu ida-ne’e ba sentru peskiza tolu ne’e hodi bele ajuda fasilita servisu peskiza iha agrikultura, ortikultura nian ho di’ak.
“Espera ho mákina tratór tolu ne’e, bele hasa’e produsaun agríkola tanba daudaun ne’e ita iha batar, fore-rai, fehuk-midar, nune’e bele aumenta tan ortikultura iha sentru sira”, diretór ne’e otimista.
Ezekutivu ne’e mós apela ba responsavel sentru peskiza sira atu kuidadu mós ekipamentu; tenke halo manutensaun hela de’it, nune’e bele uza to’o tinan naruk nia laran.
Iha oportunidade ne’e, Peskizadora sentru peskiza Darasula, Julieta Lídia, sente kontente ho apoiu ne’e.
Nia mós konsidera katak sentru peskiza referidu krekas tebes ho nutrisaun. Nune’e ho apoiu tratór sira ne’e hanesan inisiativa di’ak ida ba sira hodi halo buat ruma inkluzivamente iha sira-nia sentru. “Iha ita-nia sentru ne’ebá ninia nutrisaun lahanesan ho sentru peskiza sira seluk”, nia kompara.
Peskizadora ne’e mós relata, Sentru peskiza Darasula, iha rai hektaré sanulu resin-rua, no iha ne’ebá kuda hanesan fore-rai. “Entaun ho tratór ne’e, ita bele aumenta tan produsaun hanesan ortikultura”, nia kompromete
Entretantu, tratór tolu ne’e hanesan multi-funsaun tanba kompostu mós ninia ekipamentu tolu hanesan, ekipamentus ba ko’a du’ut nian, ida fali hodi ko’a rai no ikusliu mak hodi harahun rai.
Notísia relevante:MAPPF entrega mákina modernu ba grupu agríkola iha Ermera
Jornalista: Alexandra da Costa
Editór: Rafael Ximenes de A. Belo
