DILI, 15 Agostu 2025 (TATOLI)—Governu Timor-Leste liuhusi Ministériu Turizmu no Komérsiu (MKI) sei organiza feira komérsiu internasionál Dili tinan 2025 nian (DITE 2025) ba edisaun dahuluk, durante loron-lima, hahú 28 Agostu to’o 01 Setembru tinan ne’e, iha Sentru Konvensaun Dili (CCD, sigla portugés).
Eventu ne’e nu’udar fórum kooperasaun ekonómika no komersiál entre Xina no País ho Lian Portugés (Macau).
Tuir nota ne’ebé Ajénsia TATOLI asesu, Sesta ne’e, eventu ne’e ho objetivu atu halibur país hotu,empreza kiik no média sira, negosiante sira, Organizasaun Naun Governamentál (ONG) no entidade governamentál hodi hato’o sira-nia konkista komérsiu nian, ne’ebé haktuir kona-ba inovasaun sira ne’ebé ikus nian iha setór kultura no teknolojia hodi promove koloborasaun iha setór no área hotu.
Eventu ne’e hodi atrai investidór sira husi Grande Baía (Guangdong-Hong Kong-Macau), emprezáriu sira husi setór oinoin hanesan komérsiu, prestadór servisu sira, instituisaun finanseira no banku.
Institutu Promosaun ba Investimentu no Komérsiu (IPIM, sigla portugés) husi Governu Rejiaun Administrativa Espesiál Macau (RAEM) sei lori emprezáriu hamutuk 19.
Notísia relevante : Feira komersiál TLAUCON2025 sai plataforma promove produtu no atrai investimentu
Klibur Indústria aroma Natural China Macau sei lori emprezáriu hamutuk 14 husi setór oinoin husi Macau, Guangdong, Hong Kong no Huabei, no Xina.
Aleinde ne’e, eventu ne’e hola mós parte husi investigadór sira husi universidade sira husi Hong Kong Chuhai College, ho partisipasaun profesora asosiadu na’in-rua no asistente na’in-rua, ne’ebé sei halo estudu no peskiza iha ámbitu inisiativa ‘Faixa ho Rota’.
Husi Macau mós sei hola parte reprezentante na’in-tolu husi CPDFund. Iha feira ne’e rasik empreza sira husi Macau no Guangdong sei asina protokolu kooperasaun no kontratu sosa no fa’an ho sira ninia parseiru timoroan, ne’ebé abranje ba área sira hanean produtu kafé, mina kamí, mina nuu, boek, investigasaun ba produtu esénsia sira, bee-moos no kontrusaun rasik.
Sei asina nota entendimentu hitu
Iha ámbitu ne’e sei asina kontratu ba fa’an no sosa husi Macau coffee, ne’ebé hanesan kompañia limitada no Timor Global, empreza distribuidor Café Timor-Leste, sei asina kontratu sosa no fa’an kafé ho valór $808.800.
Empreza Água Nova de Timor (Macau) sei asina akordu ho Ministériu Edukasaun hodi instala mákina bee-moos iha eskola públika sira hotu.
Grupu konstrusaun TOP Builder, Macau no Huafa Group (Zhuhai) sei asina protokolu iha Seito Kontrusaun nian hodi hola parte iha dezenvolvimentu infraestrutura iha Timor-Leste. MATICH,Co.,Ltd sei asina protokolu rua ho empreza produsaun mina nuu virjin no Timor Mariscos/Sea Food.
Franccine Chicard (Macau) sei asina protokolu ho Acelda, empreza produtu ba mina kamí no protokolu ida iha koperasaun investigasaun.
Rejista ona katak partisaun investidór sira husi Grande Baía hodi investe iha dezenvolvimentu Timor-Leste ne’ebé integradu husi CAIZI Group (China) ne’ebé parseiru ho Leong IU Kau (Avo Akau), husi Grupn Zhuhai Deguang Electronic Product Factory Co., Ltd. Caizi group iha Janeiru 2025, asina ona pre-akordu investimentu ho Delegadu Timor-Leste iha Fórum Macau, ho totál ba investimentu biliaun $1, ne’ebé fahe ba faze sira hanesan investimentu: resorts inetradu, fábrika manufatureira ba konstrusaun sivíl no indústria sira seluk.
TATOLI
