DILI, 15 Agostu 2025 (TATOLI)-Valór pagamentu ne’ebé sei aplika husi Diresaun Servisu Rejistu Notariadu ba sidadaun ne’ebé trata Billete Identidade, Sertidaun Moris, Rejistu Kriminál ho dolar-lima, Sertidaun Erdeiru ninia valór mak $50. Enkuantu, legaliza selu ho dolar-ida.
Diretór Jerál Servisu Rejistu Notariadu, Agostinho Goncalves Vieira, hatete implementasaun ne’e bazea ba dekretu lei númeru 46/2011, 19 Outubru ne’ebé ko’alia konaba rejime emolumentár ba rejistu no notariadu.
“Ida-ne’e polítika Governu, ami ezekuta de’it”, Agostinho dehan ba TATOLI iha nia kna’ar fatin Kolmera, sesta-ne’e.
Nia esplika, lei ne’e iha artigu 8 to’o artigu 12 fó kompeténsia ba Servisu Rejistu Notariadu haree ba tarifa sira selu emolumentu nian.
“Desizaun Governu ita tenke submete, tanba ne’e tinan oin ita sei hahú aplika ba ita-nia sidadaun para bele selu emolumentu”, nia konklui.
Husi lei ne’e artigu 15 ko’alia konaba destinu hosi reseita sira ne’ebé halibur 1) reseita hotu ne’ebé halibur hosi emolumentu ka enkargu seluktan, rai hotu iha kofre Estadu nian. 2) kuantia hotu-hotu ne’ebé simu, bele hosi preparu ka emolumentu rai, loroloron, liuhosi guia, iha konta aberta no Banku ka insttituisaun kréditu, Governu maka hatudu, tuir númeru, xeke vizadu ka vale postál afavór ba Estadu.
Alínea 3) hatete bandu notáriu, konservadór, funsionáriu ka ajente hosi rejistu no notariadu, dirijente servisu, atu husik kuantia ruma ne’ebé halibur tiha afavór ba Estadu iha servisu liu hosi oras rua nulu resin-haat nia laran.
Notísia relevante: Tinan-oin DSRN sei aplika pagamentu ba atendimentu públiku
Jornalista : Natalino Costa
Editora : Rita Almeida
