BAUKAU, 16 Agostu 2025 (TATOLI) – Konstrusaun sistema irrigasaun iha Modobuti, iha aldeia Uatua, suku Gariuai, postu administrativu Baukau Vila, sei fornese bee ba natar ektare rihun-resin hodi hasa’e produsaun agríkola.
Projetu konstrusaun ne’e finansia husi Governu liuhusi Ministériu Agrikultura, Pekuária Peska no Floresta (MAPPF), ne’ebé ezekuta husi empreza internasionál China Nuclear Industry-22 Construction CO.LTD, ho orsamentu millaun $22,6 no durasaun serbisu durante tinan tolu. Kontratu ne’e identifikadu ho númeru TENDER/027/MAPFF-2024.
Bainhira projetu ne’e konklui, sistema irrigasaun ne’e sei fornese bee ba natar ektare 1.294, kompostu husi parte karuk ektare 699 no loos 595. Komunidade ne’ebé sei benefisia husi irrigasaun ne’e mak suku Gariuai, Uailili, Samalari, Builai, Buibau, Kaibada Makasa’e, Buruma no Seisál.
Prezidente Autoridade Baukau, Veneranda Lemos Martins, destaka katak projetu ne’e resposta konkreta ida ba luta populasaun nian atu funsiona fali natar ne’ebé abandonadu durante tinan barak tanba falta bee.
“Ho konstrusaun ida-ne’e, ami fiar no sei hatudu ba nasionál katak Baukau sei fó han ba nia an rasik husi produtu lokál”, Veneranda Lemos hateten iha Modobuti, ohin.
Nia akresenta katak irrigasaun Modobuti reprezenta esperansa ba agrikultór sira iha zona Fatumaka, ne’ebé abranje ba suku Buibau, Samalari, Uailili, Builai no Gariuai.
Fatin ba konstrusaun ne’e, koñesidu hanesan Uailesu Ualinu Lo-Misa, ne’ebé konsidera lulik no iha fronteira entre Baukau no Vikeke. Bee-mota ne’e sulin husi foho mundu perdidu, iha postu administrativu Ossú, munisípiu Vikeke, ne’ebé liu husi área postu Venilale to’o Seisál, postu Baukau Vila.
Konstrusaun kanál irrigasaun ne’e inklui área ne’ebé akumula bee ho metru kuadradu 200, ho kanál irrigasaun módulu portaun (bokadura) rua, kompostu husi kanál husi leste (parte loos) ho distánsia kilómetru 14.404 no oeste (karuk) ho distánsia kilómetru 18.192.
Veneranda reforsa kompromisu autoridade munisipál hodi kolabora to’o projetu ne’e konklui.
“Ami sei kontribui ba projetu ida-ne’e to’o konstrusaun remata tuir nia tempu ho kualidade hodi fó moris ba agrikultór sira”, Veneranda akresenta.
Prezidente Autoridade Baukau ne’e hamutuk ho líder lokál, reprezentante igreja no Kombatente Libertasaun Nasionál hato’o agradese ba Governu ne’ebé deside kontrui irrigasaun Modobuti tanba sei benefisia komunidade sira iha postu Baukau Vila.
Notísia relevante: Primeiru-Ministru lansa fatuk dahuluk ba konstrusaun irrigasaun Modobuti
Jornalista: Natalino Belo
Editora: Maria Auxiliadora
