MKAE hakarak orsamentu adisionál atu halo preparasaun pós-adezaun TL ba ASEAN
DILI, 16 Agostu 2025 (TATOLI)-Ministériu Koordenadór Asuntu Ekonómiku (MKAE) husu adisionál millaun $4-resin iha reuniaun Komité Revizaun Orsamentu (KRO) 2026 atu implementa prioridade boot rua.
Ministru Koordenadór Asuntu Ekonómiku, Francisco Kalbuadi Lay, hateten tetu fiskál ne’ebé Ministériu Finansa haruka ba MKAE hamutuk $2.015.417 ne’ebé fahe ba saláriu no vensimentu $577.832 no bens no serbisu $1.437.585.
“Tetu ne’ebé ami simu ba planu prioridade sira iha tinan oin la to’o, entaun husu fali adisionál, tanba ha’u-nia serbisu ne’e koordena asuntu ekonómiku, liuliu atu haree pós-adezaun ba ASEAN nian, nomós ba Organizasaun Mundiál Komérsiu”, Francisco Kalbuadi Lay hateten iha Ministériu Finansa.
Adezaun formál Timor-Leste nian ba ASEAN marka ona ba 26 Outubru 2025 ne’e, iha simeira Xefe Estadu no Xefe Governu ba da-47 ne’ebé sei hala’o iha Kuala Lumpur, Malázia. Nune’e, MKAE husu verba adisionál ba asuntu ne’e.
Nia esplika katak iha parte seluk tenke serbisu hamutuk ho Ministériu Agrikultura, Ministériu Komérsiu no Indústria, Ministériu Transporte no Komunikasaun no seluk tan atu haree ba kreximentu ekonómiku.
“Ita mós presiza atu suporta peritu sira mai hakerek enkuadramentu legál sira atu hasees ita husi barreira tékniku ba komérsiu nian, produtu agríkola no naun-agrikola sira bele ona tama iha merkadu globál no rejionál. Entaun, orsamentu adisionál ne’e sei koloka ba prioridade sira ne’e”, dehan.
Kona-ba ezekusaun Orsamentu Jerál Estadu 2025 nian, ministériu ezekuta ona 52% husi totál alokasaun hamutuk millaun $4,5.
Jornalista: Arminda Fonseca
Editora: Maria Auxiliadora
