TURISKAI, 16 Agostu 2025 (TATOLI) – Prezidente Repúblika (PR), José Ramos-Horta, promote sei halo esforsu hodi ko’alia ho nia omólogu indonéziu, Prabowo Subianto, hodi buka tuir paradeiru restu mortál Primeiru-Ministru no segundu Xefe Estadu, Nicolau Lobato, ne’ebé mate iha área Binani, Suku Mindelo, Postu Administrativu Turiskai, Munisipiu Manufahi, iha loron 31 dezembru 1978.
PR hato’o afirmasaun ne’e bainhira halo vizita traballu ba Suku Mindelo, Posto Administrativu Turiskai, Munisípiu Manufahi, sábadu ne’e, iha ámbitu komemorasaun Aniversáriu Forsa Armada Libertasaun Nasionál Timor-Leste (FALINTIL) ba dala-50, hodi fó omenajen ba Nicolau Lobato, ne’ebé sakrifika-an hodi lori Timor-Leste hetan independénsia.
Xefe Estadu hatete sei husu ba Indonézia, liliu atuál Prezidente Repúblika indonéziu atu entrega restu mortál eroi nasionál ne’e, tanba nia hatene Nicolau Lobato.
“Ha’u espera bainhira hasoru Prezidente Prabowo iha Timor-Leste ka iha Indonézia, ha’u sei husu tanba nia hatene Nicolau Lobato. Ne’e sei simbóliku bo’ot bainhira Prabowo mak entrega restu mortál [Nicolau Lobato]”, Ramos- Horta informa ba jornalista sira iha área Binani.
Ramos-Horta haktuir, bainhira simu pose nu’udar Xefe Estadu, kria ona komisaun ida hodi ko’alia ho Primeiru-Ministru no ba to’o Indonézia, maibé seidauk iha rezultadu pozitivu.
“Ko’alia ona ho jenerál indonéziu nian balu inklui ha’u rasik ko’alia ho Hendropriyono [Jenerál Reformadu Indonézia], uluk kedas ha’u koa’lia ho [eis-Prezidente] Megawati, Susilo Bambag Yudhoyono no sira seluk, Ami hakarak Nicolau Lobato nia-ruin, maibé too agora seidauk iha rezultadu 100%”, haktuir.
Lembra fali katak, iha tinan 2021, Governu Timor-Leste, liuhusi eis-Ministra Negósiu Estranjeiru no Kooperasaun, Adaljiza Magno, halo ona esforsu no intensifika kontaktu ho Indonézia hodi hatudu Nicolau Lobato nia-ruin, maibé laiha resposta satisfatória.
Nune’e mós iha ex-Embaixadór Indonézia nian ba Timor-Leste, Sahat Sitorus, nia tempu ne’eba promete sei ko’alia ho nia Governu no halo diálogu ho eis-líder militár no polítiku Indonézia nian hodi aselera prosesu buka tuir restu mortál Nicolau Lobato nian, maibé prosesu laiha avansu signifikativu to’o diplomata ne’e termina nia misaun diplomátika.
Nicolau Lobato moris iha 24 maiu 1946 iha Sasatan Oan, Aitara Hun, Soibada, Postu Administrativu Laklubar, Munisípiu Manatutu.
Nicolau Lobato maka oan dahuluk husi aman Narcísio Manuel Lobato husi suku Leorema, Postu Administrativu Bazartete, Munisípiu Liquiçá no Felismina Alves Lobato, Soibada oan ne’ebé moris iha Malurucumo/Macadique, Postu Administrativu Uatulari, Munisípiu Viqueque. Kazál ne’e iha oan mane ida ho naran José Lobato.
Notísia relevante:Ramos-Horta husu dezenvolve área Binani-Mindelo hodi fó omenajen ba Nicolau Lobato
Jornalista: Afonso do Rosário
Editora: Isaura Lemos de Deus
