BAUKAU, 16 Agostu 2025 (TATOLI)—Primeiru-Ministru (PM), Kay Rala Xanana Gusmão kolleta hare ho tipu nakroman iha Suku Seisal, Postu Administrativu Baucau Vila, Munisípiu Baukau no aumezmu tempu enkoraja komunidade atu esforsu aan maka’as liután liuliu aproveita bee ne’ebé kanalizadu ona hodibele hasa’e produsaun hare nune’e bele redús importasaun foos husi estranjeiru.
“Ha’u hakarak atu husu de’it ba imi membru Governu sira atu servisu karik, haluha tiha familiarizmu, grupuizmu no seluk tan. Tau povu ne’e iha oin. Tenke servisu ba povu nia moris di’ak,” Primeiru Ministru Xanana Gusmão hateten iha Sábadu ne’e.
Iha fatin hanesan, Xefe Suku Seisal, Agus Ferdinand de Carvalho hato’o sentimentu orgullu no hato’o agradesimentu ba Governu ne’ebé konsege solusiona kanál bee ba natar ektare 180 iha área Seisal ne’ebé abandonadu durante tinan-12.
“Governu konsege kanaliza bee bá ami-nia natar. Tinan ida-ne’e ami konsege halai fali natar. Ami agradese boot ba Governu,” Agus Ferdinand de Carvalho agradese.
Notísia relevante: Irrigasaun Modobuti sei impulsiona produsaun agríkola iha Baukau
Kanál irrigasaun iha Seisal hahú funsiona hikas hafoin Governu liuhosi Ministériu Agrikultura, Pekuária, Peska no Florestas (MAPPF), loke kanál bee hamutuk tolu hodi kanaliza bee ba natar ho totál ektare 180 nune’e tinan-ne’e komunidade halai dahuluk ektare 80 husi totál ektare 180.
Entretantu, partisipa iha serimónia kolleta ne’e kompostu husi Primeiru-Ministru, Xanana Gusmão, Ministru Agrukultura, Pekuária, Peska no Floresta (MAPPF), Marcos da Cruz, Prezidente Autoridade Munisipál (PAM), Veneranda Lemos Martins no komunidade agrikultór husi Suku Seisal.
Jornalista: Natalino Belo
Editór: Xisto Freitas da Piedade
