DILI, 18 Agostu 2025 (TATOLI)-Motorista sira ne’ebé kondús karreta no motoriza ne’ebé para la tuir regra hodi hamosu engarafamentu tanba falta konsiénsia no mós viola regra kódigu Estrada.
“Durante ne’e iha kapitál Dili, karreta no motór barak mak para arbiru, tanba konsénsia husi motorista sira ba lei kódigu estrada mak seidauk iha, dala-ruma hamosu engarafamentu. Tanba ne’e, ha’u husu ba motorista sira tenke hatudu ita-boot sira kumpre ba kódigu estrada, nune’e ita bele prevene engarafamentu iha kapitál Dili, liuliu dalan públiku sira”, Komandante Polísia Nasionál Timor-Leste munisípiu Dili, Superintendente Xefe Orlando Gomes, ba jornalista sira iha nia servisu fatin Kaikoli, segunda-ne’e.
Nia dehan, dekretu-lei númeru 6/2003, 3 abril, lei kódigu estrada ne’e klaru ona katak sé mak lori karreta tenke kumpre ba regra tránzitu no rodoviáriu nian.
“Ita haree dala-ruma ita-nia motorista para karreta no motór arbiru de’it iha dalan protokolu sira. Kadavez ita haree balun para karreta no motór liu kedan ba dalan klaran. Dala-ruma balun para sa’e ba trotar leten, ida-ne’e viola regra tránzitu nian kuandu polísia tránzitu hetan halo kedas apreensaun no aplika multa”, katak nia.
Nia dehan, artigu 94 husi dekretu-lei ne’e klaru, sé mak para veíkulu ho diresaun kontráriu no para la tuir regra ne’e tenke aplika multa.
“Ha’u husu ba maluk sira ne’ebé lori karreta no motór tenke kumpre ba kódigu Estrada, nune’e ita bele prevene engarafamentu”, nia fó-hanoin.
Notísia relevante: Tránzitu Dili husu kumprimentu oráriu operasaun karreta tula kontentór
Jornalista : Natalino Costa
Editora : Rita Almeida
