DILI, 18 Agostu 2025 (TATOLI)-Timor-Leste iha 20 Agostu komemora loron Forsa Armada ba Libertasaun Nasionál Timor-Leste (FALINTIL) ba da-50, nune’e deputadu sira iha Parlamentu Nasionál (PN) konsidera jerasaun foun presiza hatene istória pásada hodi sai kontinuadór ba dezenvolvimentu Nasaun nian.
Deputadu husi bankada governu husi partidu Kongresu Nasionál Rekonstrusaun Timor (CNRT, sigla portugés), Patrocíonio dos Reis Fernandes, konsidera komemorasaun loron istóriku ne’e importante tebes. Tanba papél FALINTIL lori influénsia boot ba susesu iha prosesu luta libertasaun Nasaun nia indepedénsia.
Nia relembra, FALINTINL nu’udar liman kro’at povu nian iha tempu rezisténsia, esperansa povu ninian hodi hateke ba libertasaun pátria.
“Ne’e importante katak, Estadu iha obrigasaun tina-tinan komemomera, hatutan ba sidadaun hotu, liliu jerasaun foun atu halo reflesaun ba loron istóriku ne’e”, nia katak.
Nu’udar sidadaun, nia hatete presiza hatene prosesu to’o iha faze-ida independente no iha liberdade. “Ne’e liuhusi perkursu naruk, lori sofrimentu, sakrifisiu ho ema lubun ninia dedikasaun tomak hodi fó vida”.
Deputadu ne’e apela foinsa’e sira atu hatene istória hodi sai kontinuadór ba dezenvolvimentu Nasaun ida-ne’e nian.
Iha parte seluk, nia observa transformasaun FALINTIL ba Forsa Defeza Timor-Leste (F-FDTL) to’o loron iha progresu maibé ezekutivu presiza kontinua presta atensaun hodi moderniza instituisaun ne’e sai forsa modernu liután.
Deputadu husi bankada opozisaun Frente Revolusinária Timor-Leste Independente (Fretilin), Oscar Lima, kontinua husu F-FDTL atu sai profisionál liután sai nu’udar lutu Nasaun nian no Governu presiza investe liután ekipamentu, formasaun no seluk tan.
Xefe bankada opozisaun husi Partidu Libertasaun Populár (PLP), Maria Angelina Sarmento, konsidera tema komemorasaun tinan ne’e relevante tebes, tanba F-FDTL mós promove ofisiál sira partisipa forsa manutensaun pás iha mundu.
“Entaun, ida-ne’e lori ona Timor-Leste nia naran ba mundu, hodi hatudu katak maske ita Nasaun ki’ik, maibé bele integra kontribui pás iha mundu, liliu país sira ne’ebé ohin loron enfrenta hela funu no konflitu”, dehan Angelina Sarmento.
Bibán ne’e, deputada solisita Governu atu halo reforma ba veteranu ativu iha instituisaun F-FDTL presiza fó rekoñesimentu Estadu nian ho dignu ba sira ninia dedikasaun.
Xefe bankada husi Partidu Demokrátiku (PD), Manuel Henrique Noronha, lori bankada parabeniza FALINTIL no hakruk tomak ba erói sira hotu ne’ebé mate ba Timor-Leste nia indepedénsia.
Tuir Nia, FALINTIL nia ezisténsia durante tinan 24 iha sofrimentu lubun iha aí-laran terus maibé la rende. “Ho komemorasaun ne’e nafatin husu lolo-liman, FALINTIL hanesan lutu ba Nasaun, FALINTIL forte Nasaun di’ak, husu F-FDTL mantein ita bo’ot sira-nia serbisu”.
Tema ba komemorasaun loron FALINTIL tinan ne’e Governu hili “ESTENDE A Paz AO MUNDO”.
Notísia relevante: Tinan 50 reflete loron FALINTIL, estudante tenke sai kontinuadór
Jornalista : Nelson de Sousa
Editora : Rita Almeida
