DILI, 18 Agostu 2025 (TATOLI)—Hospitál Nasionál Guido Valadares konsidera Governu halo lansamentu ba kartaun konsulta dijitál ne’e apoia tebes ospitál, tanba daudaun ne’e tama ona ba era teknolojia presiza hadi’a duni dijitalizasaun ba sistema saúde iha Timor-Leste.
“Kartaun dijitalizasaun ne’e ajuda tebes Hospitál Nasionál Guido Valadares, tanba agora iha tama ona era dijitalizasaun ho teknolojia avanzadu ita presiza dijitál duni. Ita-nia sistema saúde, sistema informasaun, atu nune’e fasil pasiente no fasil ba pesoál saúde sira atu konsulta karik, konsulta ho lalais ka ba oin bele halo apoitmentuatu hasoru doutór sé bele liu husi via online,” Diretór Servisu Apoiu Diagnóstiku no Terapeutiku Vidal de Jesus Lopes hateten ba jornalista sira sira iha nia kna’ar fatin, HNGV, Bidau, ohin.
Nia dehan, daudaun ne’e Hospitál Nasionál Guido Valadares hahú uluk ho medical record tanba uza sistema ne’e la fasil.
“Ita hahú buat ne’ebé mak ki’ikoan halo ho etapa, dijitál sistema dadus, ne’ebé ita fó prioridade, ita hahú husi ki’ik, ne’e mak sistema dijitalizasaun ne’e mak ospitál presiza liu husi faze ne’e. La’ós fasil, agora ita hahú uluk husi ne’ebé, hahú husi médical record, la’ós ita hahú ba dala ida de’it tenke di’ak kedas lae. Maibe sei iha prosesu balun nia laran, ne’ebé ida propriedade atu HNVG implementa uluk mak médical record uluk, nune’e sistema dijitalizasaun dadus ne’e la’o ho di’ ak,” nia hateten.
Nia dehan, kria tiha sistema dijitál ne’e atu hatene pasiente tama hira, mediku sira haree uluk ida-ne’e, depois mak tama ba sira seluk entaun ida-ne’e mak atu implementa uluk iha HNGV.
Iha sorin sleuk, Minitra Saúde, Élia dos Reis Amaral, informa durante tinan barak ona Hospitál Nasionál Guido Valadares simu de’it kartaun maibé dalaruma mai dadus la iha.
“Tinan naruk ona, ita hotu inklui ha’u no mós, ita-boot sira ba iha Hospitál Nasionál Guido Valadares simu kartaun, kartaun ida-ne’ebé mak dez venkuandu mai la iha nia dadus. Entaun, ita hanoin katak tempu to’o ona ita presiza halo mundansa. Kartaun atu kompleta, atu haree ba ID no aumezmu tempu haree ba nia diagnóstiku, aumezmu tempu ita haree ba ai-moruk, aumezmu tempu ita bele kontrola ai-moruk entrada no saida. Aumezmu tempu mós ita bele haree mós doutór sira-ne’e mak fó preskipasaun hodi bele kontrola ho dijitalizasaun ne’ebé mak ita hahú,” nia hateten.
Programa ne’e, nia dehan, programa ne’e sei hahú uluk iha Hospoitál Nasionál Guido Valadares depois to’o iha territóriu tomak.
“Ita hahú ohin ba oin, no sei vale to’o territóriu nasionál sei utiliza kartaun ida-ne’e. Ita hetene katak kartaun ida-ne’e sei halo ligasaun ho pasiente no mós ho servisu nasionál saúde,” nia dehan.
Entretantu, kartaun konsulta dijitál ida-ne’e hetan lansamentu husi Primeiru Ministru, Kay Rala Xanana Gusmão, depois lansamentu Organizasaun Saúde Mudiál mós entrega diretamente Sertifikadu livre Malária ba Governu Timor-Leste.
Jornalisita : Felicidade Ximenes
Editór : Cancio Ximenes
