DILI, 18 Agostu 2025 (TATOLI)–Ministru Ensinu Superiór Siénsia no Kultura (MESSK), José Honório, informa, Governu sei taka kursu ne’ebé hanesan iha Institutu Ensinu Superiór (IES) iha Timor-Leste.
“Ami iha dadus kompletu, nune’e iha tempu badak sei taka kursu balun ne’ebé la periense kritériu. Tanba ne’e, ita husu Institutu Ensinu Superiór sira atu kompre kritériu,” Ministru José Honório, hato’o ba jornalista sira iha INCT, Balide, Segunda ne’e.
Notísia relevante : Reitór DIT husu MESSK fó lisensiamentu ba IES loke kursu doutoramentu
Governante ne’e dehan, iha nasaun ida iha mos ministériu ne’ebé toma konta ba ensinu superior, nune’e atu loke kursu ida tenke iha lisensimentu, tanba ne’e IES tenke la’o tuir kritériu ne’ebé estabelese ona, katak IES loke ona kursu Medisina entaun seluk labele loke tanba autoriza de’it kursu foun iha IES seidauk loke.
“Loos duni iha balun laiha lisensimentu maibé sira fó graduasaun, tanba ne’e ami haree hela asuntu ida-ne’e atu rezolve, maibé hahú 2026 ita labele iha tan ida-ne’e,” nia akresenta.
Tanba ne’e, MESSK husu IES estabelesidu atu kumpre dekretu-lei númeru 2/2018 makfoin bele loke kursu dotouramentu iha Timor-Leste.
“Governu la bandu institutu ka universidade atu serbisu ho universidade kualifikadu ne’ebé ho nível grau akadémiku di’ak liu atu loke kursu dotouramentu depois atribui sertifikadu ba estudante sira, maibé ita-nia rasik seidauk bele,” Ministru José Honório, katak.
Nia dehan, dekretu-lei ne’e iha klasifikasaun haat mak hanesan profesór asistente, profesór leitór, profesór asosiadu no profesór katedrátiku.
Jornalista : Osória Marques
Editora : Julia Chatarina
