VIKEKE, 18 Agostu 2025 (TATOLI)–Komemora loron Forças Armadas da Libertação Nacional de Timor-Leste (FALINTIL) ba dala-50 (20 Agostu 1975-20 Agostu 2025), Autoridade Munisipál Vikeke realiza marsa populár hodi reflete loron FALINTIL.
“Marsa populár ne’e ita reflete ezisténsia FALINTIL iha tinan 1975 hodi luta iha ai-laran ba libertasaun nasionál. Tan ne’e, ita realiza marsa ida-ne’e hodi hanoin fali ita-nia FALINTIL sira iha pasadu ne’ebá no liuhusi marsa ne’e ita relembra filafali ita-nia FALINTIL nia sofrimentu sira,” Prezidente Komisaun Organizadora selebrsaun loron FALINTIL ba Munisípiu Vikeke, Acacio de Sousa dehan ba jornalista sira iha Vikeke Vila, Segunda ne’e.
Nia haktuir rota ba marsa populár hahú husi kampu futeból Vikeke Vila, Jardín 1959, merkadu Vikeke Vila, Dom Jerimias, Oskaruas no finál iha kampu futeból.
Acacio informa katak marsa populár ne’ebé komisaun realiza hetan partisipa husi reprezentante frente tolu kompostu husi Frente Diplomátika, Armada no Klandestina.
Aleinde ne’e, nia tenik, Komisaun Organizadóra realiza mós atividade sira seluk hanesan dada tali, feira produtu lokál no isár bandeira.
Iha fatin hanesan, Prezidente Autoridade Munisipál Vikeke, Francisco C. S de Gonzaga Soares hateten luta tinan 24 forsa FALINTIL lubuk ida sakrifika aan defende ukun-rasik aan.
“Iha luta tinan 24, ita-nia inan no aman sira halo servisu lubuk hodi defende rai ida-ne’e to’o ita hetan liberdade no agora laiha ona inimigu. Ita mesak maun-alin de’it. Ita tenke banati tuir ita-nia eroi sira,” nia hato’o.
Notísia relevante: Autoridade Vikeke hahú prepara kondisaun ba selebrasaun loron FALINTIL
Iha fatin hanesan, Reprezentante Xefe Estadu Maiór Jenerál F-FDTL, Tenente Jenerál Domingos Raul ‘Falur Rate Laek’, atuál Koronél F-FDTL, Celestino Pinto “Daeleba” hateten komemorasaun halibur malu la’ós de”it reflete ba pasadu, maibé atu hafoun faktu valór sira-ne’ebé fó sentidu ba futuru.
Iha biban hanesan, Ministra Saúde, Élia Amaral informa katak selebrasaun loron FALINTIL ba dala-50 ne’e ba povu Timor-Leste nian, nune’e husu povu atu partisipa másima.
“Loron FALINTIL ne’e ita hotu-hotu nian. Ita husu funsionáriu no komunidade atu partisipa másima liután,” nia hato’o.
Tuir observasaun TATOLI iha Munisípiu Vikeke nota katak iha marsa populár ne’ebé autoridade munisípiu realiza maski loron manas, maibé governante, autoridade lokál no komunidade la’o tuir rota ne’ebé komisaun trasa to’o ramata la’o ho di’ak. Marsa ne’e lori bandeira RDTL no bandeira FALINTIL.
Iha marsa ne’e, partisipa husi membru Governu kompostu husi Ministra Saúde, Élia Amaral, Ministru Agrikultura, Peska, Pekuária no Floresta, Marcos da Cruz, Sekretáriu Estadu Dezenvolvimentu Lokál, Prezidente Autoridade Munisipál Vikeke, Francisco C. S de Gonzaga Soares, Reprezentante Xefe Estadu Maiór Jenerál F-FDTL, Tenente Jenerál Domingos Raul ‘Falur Rate Laek’, Komandante Polísia Nasionál Timor-Leste Munisípiu Vikeke, membru PNTL, F-FDTL, autoridade lokál, veteranu, seguransa sivíl, komunidade no estudante.
Jornalista: Vitorino Lopez da Costa
Editór: Xisto Freitas da Piedade
