Milan Victor : Prezidente Ramos-Horta nia esperiénsia sai motivasaun serbisu UNFSU
DILI, 18 Agostu 2025 (TATOLI)–Prezidente Sindikatu Funsionáriu Terrenu Organizasaun Nasaun Unida ONU (UNFSU, sigla inglés), Milan Victor Dawoh, hasoru malu ho Prezidente Repúblika (PR), José Ramos-Horta hodi ko’alia kona-ba relasaun Timor-Leste ho ONU nian.
Nia dehan, objetivu ohin hasoru malu ho Xefe Estadu tanba antes ne’e iha tinan 2007, nia parte destaka iha Timor-Leste, ne’ebé hala’o misaun husi Misaun Integrada Nasaun Unida iha Timor-Leste (UNMIT, sigla inglés) ne’ebé responsável ba seksaun transporte no halo formasaun balun ba Polísia Nasionál Timor-Leste (PNTL).
“Ohin ha’u mai fali tanba hakarak mai komprimenta Prezidente Repúblika tanba durante ha’u hala’o misaun iha Timor-Leste apreende buat barak husi Presidente Ramos-Horta. Ho ida-ne’e ohin hasoru malu ami kona-ba ita-nia organizasaun nia futuru, oinsá bele sai organizasaun ida ne’ebé di’ak liu,”Milan Victor Dawoh, hateten iha Palásiu Prezidensiál, Bairru-Pité, Segunda ne’e.
Notísia relevante : Governu-UNFPA-Tailándia asina akordu harii sentru kuidadu emerjénsia obstétriku iha Baukau
Nia haktuir, durante nia hala’o misaun iha Timor-Leste 2007, atividade sira ne’ebé realiza mak hanesan forma rekursu umanu liuliu Polísia sira, hanesan prepara sira atu haruka ba misaun manutensaun ba páz hodi serbisu iha nasaun seluk.
“Entaun tinan 17 ona ha’u mai fali hasoru Prezidente Repúblika tanba nia sai ha’u nia mentór, ha’u-nia asesór, no fó orientasaun mai ha’u. Ha’u apreende buat barak husi nia lideransa boot, oinsá nia luta hodi serbisu ba nia povu hodi hetan independénsia, no nia hadomi povu,” nia katak.
Jornalista : Arminda Fonseca
Editora : Julia Chatarina
