KOVALIMA, 18 Agostu 2025 (TATOLI)–Vise-Ministru Administrasaun Estatál (MAE), Jacinto Rigoberto de Deus, hamutuk ho reprezentante Prezidente Komisaun Funsaun Públiku (KFP) no Prezidente Autoridade Munisípiu Kovalima fó pose ba Ajente Administrasaun Públiku (AAP) na’in-49 iha munisípiu Kovalima.
“ Dezde 2023 foin mak ba dahuluk munisípiu Kovalima halo termu aseitasaun ho númeru ne’ebé boot, tanba Prezidente Autoridade Kovalima defende nia Orsamentu Jerál Estadu 2026 iha KRO propoin númeru funsionáriu aas”, Jacinto Rigoberto hato’o iha nia diskursu ámbitu fó pose ba AAP iha salaun Autoridade Munisípiu Kovalima, segunda-ne’e.
Razaun propoin númeru funsionáriu aas tanba autoridade Kovalima hakarak atu envolve Kovalima-oan iha prosesu dezenvolvimentu, Kovalima rai ne’ebé riku, potensiál no iha rekursu umanu maibé oportunidade seidauk to’o atu akomoda hotu.
Prosesu rekrutamentu ema na’in-400 mak kompete iha vaga maibé na’in-49 mak pasa. Nia husu atu oportunidade ne’e hanesan responsabilidade hodi serbí.
Sai hanesan AAP la’ós ezije de’it direitu maibé presiza kumpri dever atu kontinua kumpre eroi sira-nia misaun liberta povu. “Atu liberta povu ida-ne’e, ohin ita-boot sira mak mákina Estadu hodi kontinua lori Estadu no funsionamentu administrasaun husi munisípiu ba to’o iha nasionál”.
Nia fó hanoin ba AAP ne’ebé simu pose, hatudu prestasaun servisu liuhosi disiplina, leal ba PAM no kargu xefia sira, respeita no hala’o servisu ho responsabilidade no presiza kontinua buka aprende.
PAM Kovalima, Miguel Armada Cardoso, hatete AAP ne’ebé mak simu pose ne’e hetan ona oportunidade la’os atu halimar, maibé hatene dever, presiza hatene marsa funsaun públiku, labele ezije de’it direitu.
Bazeia ba dadus funsionáriu públiku ne’ebé presta sira-nia servisu iha munisípiu Kovalima hamutuk 304, AAP hamutuk-94 no funsionáriu kazuál na’in-200-resin.
Notísia relevante: Konkorrente 308 pasa iha selesaun ba vaga ajente administrasaun públika
Jornalista : Celestina Teles
Editora : Rita Almeida
